५२गू पदया नितिं जूगु उपनिर्वाचनया फुक्क लिच्वः सार्वजनिक
म्हीग सञ्चरवाः ५२गू पदया नितिं जूगु उपनिर्वाचनया फुक्क लिच्वः सार्वजनिक जूगु दु ।
निर्वाचन आयोगं प्रतिनिधिसभाया १गू, प्रदेशसभाया ३गू, उपमहानगरपालिका प्रमुख १गू, गाउँपालिकाया अध्यक्ष ३गू, गाउँपालिकाया उपाध्यक्ष १गू व वडाध्यक्ष ४३गू पदया नितिं जूगु निर्वाचनया फुक्क लिच्वः वयेधुंकूगु न्ह्यथंगु दु ।
आयोगया प्रवक्ता राजकुमार श्रेष्ठं नेपाल कम्यूनिष्ट पार्टी (नेकपा)या उम्मेदवार ३०, कांग्रेस उम्मेदवार १३, समाजवादी पार्टीया उम्मेदवार ४, राष्ट्रिय जनता पार्टीया उम्मेदवार ३, राष्ट्रिय जनमोर्चाया उम्मेदवार १ व स्वतन्त्र उम्मेदवार १गू थासय् त्याःगु जानकारी बियादिल ।
नेपाल कम्यूनिष्ट पार्टी (नेकपा)पाखें प्रतिनिधिसभा सदस्य १, प्रदेशसभा सदस्य १, गाउँपालिका अध्यक्ष ३, गाउँपालिका उपाध्यक्ष १ व वडाध्यक्षय् २४म्ह त्याःगु दु ।
प्रतिनिधिसभाया कास्की क्षेत्र नं. २स नेकपाया उम्मेदवार विद्या भट्टराई २४द्वः ३सः व ९४कू मत हयाः त्याःगु दु । थ्व स्वयां न्ह्यः रवीन्द्र अधिकारीं त्याःगुली आः वय्कःया जहान भट्टराई त्याःगु खः ।
प्रदेशसभाया दाङ क्षेत्र नं. ३ (ख)य् नेकपाया उम्मेदवार विमलाकुमारी खत्री २४द्वः २सः व ८६कू मत हयाः त्याःगु दु । अन थ्व स्वयां न्ह्यः नं नेकपाया उम्मेदवार उत्तरकुमार ओली त्याःगु खः । खत्रीं कांग्रेस उम्मेदवार केशवराज शर्मा आचार्ययात बुकूगु खः ।
अथे हे, उपचुनाव जूगु स्वंगू गाउँपालिकाया अध्यक्ष पद संखुवासभाया मकालु, पाँचथरया फाल्गुनानन्द व महोत्तरीया पिपराय् नेकपाया उम्मेदवार निर्वाचित जूगु दु । मकालु गाउँपालिकाया अध्यक्षय् तेजबहादुर पोख्रेल ३द्व व १८कू मत, पाँचथरया फाल्गुनानन्द गाउँपालिकाया अध्यक्षय् वीरवहादुर कुरम्वाङ ५द्वः स्वसः ६९कू मत व महोत्तरीया पिपरा गाउँपालिकाया अध्यक्षय् विक्रम चौधरी स्वद्वः निसः व पीगुकू मत हयाः त्याःगु दु ।
हुम्लाया खार्पुनाथ गाउँपालिका उपाध्यक्षय् रुपा शाही झिंप्यसः व न्यय्प्यकू मत हयाः त्याःगु दु । नेकपां थीथी पालिकाया २४गू वडाध्यक्षय् त्याःगु दु ।
नेपाली कांग्रेसं प्रदेशसभा दुजः १, उपमहानगरपालिकाया प्रमुख १ व थीथी पालिकाया ११गू वडाध्यक्ष पदय् त्याःगु दु ।
प्रदेशसभा अन्तर्गत ख्वप १ (क)य् कांग्रेसया उम्मेदवार कृष्णलाल भडेल झिंस्वद्वः प्यसः व पीगुकू मत हयाः त्याःगु दु । वय्कलं नेकपाया उम्मेदवार देवीप्रसाद ढकालयात बुकूगु खः । थ्व स्वयां न्ह्यः उगु क्षेत्रपाखें नेकपाया उम्मेदवार हरिशरण लामिछाने त्याःगु खः ।
धरान उपमहानगरपालिकाया प्रमुखय् कांग्रेसया उम्मेदवार तिलक राई नीखुद्वः न्हय्सः व गुकू मत हयाः त्याःगु दु । वय्कलं नेकपाया उम्मेदवार प्रकाश राईयात बुकूगु खः । धरानय् कांग्रेसं प्रमुख पदय् त्याःगु थ्व न्हापांखुसी खः ।
कांग्रेसं थीथी ११गू पालिकाया वडाध्यक्ष त्याःगु दु ।
प्रदेशसभाया बाग्लुङ २ (ख)य् नेकपाया समर्थनय् जनमोर्चाया उम्मेदवार खिमविक्रम शाही झिंछद्वः निसः व ३५कू मत हयाः त्याःगु दु । वय्कलं नेपाली कांग्रेसया उम्मेदवार जीतबहादुर शेरचनयात बुकल ।
थ्व हे झ्वलय् समाजवादी पार्टीं ४, राष्ट्रिय जनता पार्टीं ३ वडाध्यक्षय् त्याकूगु दु । अथे हे, स्वतन्त्र उम्मेदवार भीमेशकुमार घर्तीमगरं प्यूठानया एरावती गाउँपालिका २या वडाध्यक्ष पदय् त्याःगु दु ।