‘तुति सालेगु प्रवृत्तीयात क्वत्यला छ्वयेमाः’
सिल्लाथ्व एकादशि ११३७ (फेब्रुअरी ७ २०१७)
संगीत ख्यलय् ~यापरया रुपं पलाः न्ह्याका च्वनादीम्ह पंकज राजोपाध्याय । संकिपा तिन तिकः महाबिकःया थौंया दिं खुसिया दिं म्येय् वयकलं हे ~याप हालादीगु खः । लहना मिडियाया ग्वसालय् क्वचाःगु गोल्डन भ्वाइस प्रेमध्वज प्रधानया हना लिसें न्हूदँ नेपाल सम्वत ११३७ या लसताय् सांगितिक भिन्तुना ज्याझ्वः ‘भिन्तुना सनिल’स वयकलं म्येहालामि अन्जन श्रेष्ठ व बिटबक्सर निशान्त गौचनलिसे छगू विशेष न्ह्यब्वया कथं प्रेमध्वज प्रधानयात सांगितिक सम्मान नं देछानादीगु खः, गुगु न्ह्यब्वया ज्याझ्वःया स्वकुमिपिन्सं अतिकं हे ययेकूगु खः । वयकः पंकज राजोपाध्यायलसे जूगु खँल्हाबल्हा :
भिन्तुना सनिल ज्याझ्वःया अनुभव गुकथंया जुल ?
तसकं बांलाःगु अनुभव जुल । प्रेमध्वज दाइया न्ह्यःने म्ये हालेखंगु तसकं गर्वया खँ खः । म्ये हाले न्ह्यः भचा ग्याना नं च्वंगु दुगु खः । तर जब म्ये हाले सिधल, स्वकुमिपिनिपाखें वन्स मोर धाःगु तायेदुबलय् तसकं न्ह्यइपुल ।
प्रेमध्वज दाइपाखें नं बांलाः धइगु हे खँ वल । वयकलं अन्जनया सः बांलाः धयादिल । न्हूगु सवाः कथं निशान्तयात बिटवक्स याकागु नं वयकलं ययेकादिल । छिपिं स्वम्हेसिनं न्हूगु कथंया म्ये दयेकूगु बांलाः धयादिल ।
तसकं हे न्ह्यइपुल वयकःयापाखें थुकथंया खँ न्यनाः । समग्रय् तसकं हे बांलाःगु व बिस्कं कथंया अनुभव जुल ।
प्रेमध्वज दाईया न्ह्यःने वयकःया हे म्ये न्हूगु कथं हालेत गथे ताल ले ?
जिपिं ला न्हापा ग्याःगु हे खः । जिमिसं न्हापा न्हापा मेमेगु ज्याझ्वलय् नं म्ये ला हालागु दु । तर थुगु ज्याझ्वलय् प्रेमध्वज दाईया न्ह्यःने वयकःयागु हे म्ये हालेमाःगु व नं न्हूगु पहलं अझ वयकःयात हे देछानाः ।
छु जुइ गथे जुइ धइगु ला मनय् वालाच्वंगु हे खः ।
~यापयात मनूतयसं आःनं उलि बांलाक थूगु व स्वीकार याःगु मदुनि । ~याप संगीतयात ब्वःबीपिनिगु ल्याः थौं नं उलि हे दनि । व ल्याखं नं प्रेमध्वज दाईनं थुकीयात गुकथं कयादी धइगु छगू कथंया ग्याःचिकुं नुगलय् थाय् कयाच्वंगु दुगु खः । तर वयकलं बांलाः धायेधुंकाः ला संसार हे त्यात धइथें जुल ।
छिं धयादिल आः नं ˞यापयात ब्वःबीपिं उलि हे दनि धकाः । थ्व हे ख्यलय् छि गुकथं लाःवःगु खःले ?
न्यनेत ला जिं न्ह्याग्गु कथंया नं संगीत न्यना । ~याप जक मखु, लोक, गजल, भजन आदि नं न्यना । तर ~यापया माध्यमं यक्व हे भावना व यक्व हे खँत प्वंकेछिंगु खन । थुकी तं नं प्वंकेछिं, ब्वः नं बी छिं, दुःख, सुख, मतिना सकतां धायेछिं, क्यनेछिं । अथे जूंगुलिं जि थुखेपाखे आकर्षित जुल ।
~यापयात ब्वःबीपिं खनकि ताल कि गथे ताः ले ?
बांमलाः ताइ नि । मनूतयसं मथूगु हे खः कि मथू पहः याःगु खः धइथें ताइ । ब्वःब्यूगु ताःगु वा खंगु जक मखु, जिं थम्हं नं भोगे यानागु तकं दु ।
खस भायया संगीत ख्यलय् ला थ्व प्रवृत्ती यक्व हे म्ह्वः जुइधुंकल । तर नेवाः संगीत ख्यलय् अझ नं ~यापयात ब्वःबीपिं तःधंगु ल्याखय् दनि ।
ह्यूपाःयात स्वीकार यायेमाः । प्रयोग मयायेकं विकास वा न्हू पहः छुं नं खने दइमखु । नेवाः ख्यलय् झीसं न्हूगु पहःयात नं स्वीकार यानाः न्ह्याःवन धाःसा थुकिं पक्कां हे बांलाःगु लिच्वः पिहांवइ ।
~याप धइगु खास छु खः ?
~याप छु खः धइगु खँ थुगु खँग्वलय् हे सुलाच्वंगु दु । रिदम एन्ड पोएट्रि । थुकी वर्ड्स प्ले यायेगु खँ जुइ अले रिदम । एक्सप्रेसन, फिलिङ्स व फ्लो । थुलि विषय वा पक्षया संयोजनं रिदमय् ब्यक्त यायेगु पोएट्रियात ~याप धायेफइ ।
बांलाःगु ˞याप दयेकेत थुलि खँय् ध्यान बीमाः ।
थौंकन्हय् झ्याउरे म्ये, लोक म्ये न्ह्यागुलिइ नं ˞याप पहलं यो यो यायेगु नं यानाच्वंगु दु । तर थज्याःगुयात ~याप धाये थाकु । ˞यापया थःगु हे पहः दइ । व पहःयात लीमाः । मेमेपिन्सं ~याप हाःगु स्वयाः मेपिनिगु नक्कल यायेथें जक न्ह्याथे जाःगु म्ये नं ˞याप तयेत स्वयां व धाःसा ~याप म्ये जुइफइ मखु ।
~याप ख्यलय् छिगु गुरु अथवा प्रेरणा सु खः ?
जिगु गुरु धकाः धायेत जिं सुयांपाखें सयेका कयागु मदु । छेँ अथें थः हे हाहां यायां सयेकागु खः ।
पिने पिनेया एमएनएम, स्नुप डग आदिपिनिगु पाश्चात्य ~याप म्ये न्यनेगु अले व हे कथं थम्हं नं दयेके धयागु ल्याखं छुं छुं च्वल, हालास्वयेगु । उकी मिले मजूथें च्वंथाय् भिंकल अले हाकनं हालास्वल यायां सयेका ।
उकथं हे यायां १९९८ पाखे छपु म्ये दयेकाः रेकर्ड नं याना, पासापिन्त, दाजुकिजापिन्त न्यंका । लिपा २००४स दबुलिइ नं हाला । थुगु हे कथं हाहां आःतक न्ह्याःवयाच्वना ।
छिं नकतिनि धयाद्यूगु रिदम, वर्ड प्ले, एक्प्रेसन, फिलिङ्स व फ्लोया संयोजनं बांलाःगु ~याप म्ये दयेकेफइ । थ्व सकतां छिं थम्हं हे सयेका कयागु खः ला ?
खः । जि न्हापा न्हापा ˞याप शुरु यानागु इलय् मेमेपिनिगु ~याप न्यनेगु अले इमिसं थें हालेगु कुतः यायेगु । व हे कथं यायां थम्हं नं छुं च्वये धकाः च्वया अले उकी ~याप यायेत स्वया । थुकथं यायेबलय् वर्ड प्ले ताःलाःगु वा मिले जूगु थें ताये मदुतल्ले खँग्वःत उखेथुखे यायां हालास्वत ।
जब बांलाः थें तायेदइ अले उकीयात रेकर्ड यानाः तयातल । थुकथं हे अभ्यास यायां वना । जुजुं रिदम, वर्ड प्ले, एक्सप्रेसन, फिलिङ्स व फ्लोया तालमेल अथें हे सयावल ।
नेपालय् ~यापरतयगु भविष्य गज्याःगु दु ?
नेपालय् ˞यापरतयगु भविष्य बांलाः हे धायेमाः । थौंकन्हय् थुकिं यक्व हे जीवन हनेफइगु अवस्था दु । न्हापा न्हापा यक्व हे संघर्ष यायेमाःगु अवस्था दुगु खः । तर आः यक्व हे अःपुइधुंकल ।
तर समर्पण धाःसा माः । ~याप धा, मेमेगु संगीत वा कलाया विधाय् समर्पण मदयकं छुं नं यायेफइमखु । थुकी हे समर्पित जुयाः न्ह्याःवनेगु संकल्प ला दक्कले न्हापांगु खँ जुल । व धुंकाः थुगु ख्यःयात प्रोफेसनल्लि न्ह्याका वनेफयेमाल । प्रोफेसनया मान दयेमाल ।
नेवाः संगीत ख्यलय् ह्यूपाः वइ थें खनेदु लाकि थाकूगु हे खनेदु ?
ह्यूपाः हइगु धयागु ला न्यनामि वा अडियन्सं खः, कलाकारं मखु । ह्यूपाःया नितिं न्यनामिपिन्सं डिमान्ड यायेमाल । जिमित न्हूगु कथंया म्ये माल, संगीतय् ह्यूपाः माल धकाः अडियन्सं हे धायेमाल । अडियन्सं डिमान्ड यात धाःसा कलाकारपिन्सं, गायकं थःगु ज्या याइ । फक्व शत प्रतिशत मेहनत बियाः कलाकारं ज्या याइ । उकी जितः विश्वास दु ।
मेगु धइगु तुति सालेगु ज्या याइपिन्सं यानाः नं ह्यूपाः मवयाच्वंगु खः । झीगु समाजय् तुति सालीपिं यक्व दयाच्वनी । तुति सालीपिनिगु न्ह्यःने बांलाःगु बिचाः दुपिं अडियन्सं बांलाःगु ज्या याइपिं कलाकारपिन्त हःपाः बीमाः, तिबः बीमाः । अवश्य नं ह्यूपाः वइ ।
नेवाः संगीत ख्यःया कमजोर पक्ष छु खः थें ताः ?
थन गुलिखे थासय् ज्या याइम्हेसिनं स्वयां धेबा दुपिन्सं जस नयाच्वंगु नं खनेदु । धेबाया बलय् कलाकारया कलायात स्यानाः जस नइपिं हे थुगु ख्यःया कमजोरी खः । स्तर दुम्हेसित, कला दुम्ह कलाकारयात थकायेगु स्वयां मेमेपिन्सं जस नयाच्वनी ।
ज्याया जस ज्या याःम्हेसित वन धाःसा वयात हःपाः दइ । वं अझ बांलाक ज्या याना वनेफइ । तुति सालेगु, धेबाया बलं मेपिनिगु मेहनतया जस थम्हं नयेगु थज्याःगु प्रबृत्तीयात झीसं क्वत्यला छ्वये फयेकेमाः ।
थुकिया लिसें नेवाः संचार ख्यः नं बल्लाना वनेमाल । अले नेवाः संचार ख्यलं कलाकारपिन्त, कला क्षेत्रयात थकायेत सहकार्य यानावन धाःसा झीगु नेवाः संगीत ख्यः बांलानावनी ।
लहनान्यूजया ब्वँमिपिन्त छु धयादी ?
संगीतयात अन्तर्राष्ट्रिय भायया रुपं कयादिसँ । नेवाः म्येयात नं अन्तर्राष्ट्रिय बजारय् झीसं यंकेफयेमा । थुकिया नितिं न्यनामिपिन्सं हे हःपाः व तिबः बियादीमाल । म्ये दक्वं भायया न्यनादिसँ, थःगुयात फक्व तिबः बियादिसँ । सुभाय् ।
थुगु अन्तर्वार्ता नं ब्वनादिसँ
