‘मेयर निःशुल्क स्वास्थ्य परीक्षण’ ज्याझ्वः न्ह्यात
नृपेन्द्रलाल श्रेष्ठ | चौलाथ्व एकादशी ११३९ (अप्रिल १५ २०१९ं)
येँ महानगरपालिकां ‘मेयर निःशुल्क स्वास्थ्य परीक्षण’ ज्याझ्वः न्ह्याकूगु दु । नमूना कथं वंगु सञ्चर वाःनिसें येँ महानगरपालिका–१५ निसें न्ह्याकूगु उगु ज्याझ्वः सामुदायिक स्वास्थ्य सेवा परिषदय् सञ्चालन जुइ ।
उगु ज्याझ्वलय् सामाजिक सुरक्षाभत्ता कयादीपिं फुक्क ज्येष्ठ नागरिकपिन्त फुक्क कथंया ल्वय्या निःशुल्क परीक्षण याइगु जूगु दुसा वासलय् नीगू प्रतिशत छ्यापं बी । नापं सेवा कयादीपिन्त ‘मेयर निःशुल्क स्वास्थ्य परीक्षण परिचयपत्र’ नं बी ।
थुगु ज्याझ्वःन्ह्याकेत परिषदया नायः हरिगोपाल श्रेष्ठयात येँ महानगरपालिकाया प्रमुख विद्यासुन्दर शाक्यं लच्छिया नितिं छगू लख तकाया दरं दच्छिया नितिं छक्वलं झिंनिगू लखतकाया चेक लःल्हाना दिल । सञ्चर वाः न्हूदँया झ्वलय् ग्वसाः ग्वःगु भिन्तुना कालबिल नापं तुच्चा ज्याझ्वलय् ज्याझ्वःया शुभारम्भलिसें चेक नं लःल्हाना दीगु खः ।
ज्याझ्वलय् पुलांम्ह प्रधानमन्त्री झलनाथ खनालं, प्रतिनिधि सभाया दुजःजीवनराम श्रेष्ठ, नेकपाया प्रदेश ३या इञ्चार्ज लिसें प्रदेशसभाया दुजः अष्टलक्ष्मी शाक्य, महानगरया उपप्रमुख हरिप्रभा खड्गीश्रेष्ठ, वडा नं. १५या नायः लिसें महानगरया प्रवक्ता ईश्वरमान डंगोल नं थःथःगु बिचाःप्वंका दीगु खः ।
ज्याझ्वलय् सुनगाभा (बौद्धिक अपाङ्गता) महिला व्यवसायिक केन्द्रयात बाल संरक्षणया ख्यलय् याःगु योगदानया कदर याःगु खःसा बुसांनिसें न्ववाय् मसःम्ह इनिमा महर्जनयात फोटोग्राफी ख्यलय् हःपाःबी कथं हनेगु ज्या जूगु खः । अथे हे विश्व सम्पदाय् दुथ्याना च्वंगु स्वयम्भू लागाया यचु पिचुया नितिं स्थानीय गैरसरकारी संस्थालिसे नं सम्झौता याःगु खः ।
