लिभरपुल व चेल्सी त्याःबलय् टोटनह्याम बुइमाल
पोहेलागा चतुर्थी ११४१, माघ १९ सोमवाः
इंग्लीश प्रिमियर लिग फुटबलय् लिभरपुल व चेल्सी त्याःबलय् टोटनह्याम हट्सपर बूगु दु । साविक त्याकामि लिभरपुलं वेष्ट ह्याम युनाईटेडयात वयागु हे ख्यलय् ३–१ बुकाबिल ।
लिभरपुलया लागिं मोहोमद सालाहं २ गोल याःबलय् जर्जीनियो वहाल्दुमं १ गोल तन । बूगु टोली वेष्ट ह्यामया क्रेग डसनं १ गोल लितबिल ।
प्रिमियर लिगया हे मेगु कासाय् चेल्सीं बन्र्लेेयात २–० ल्यूने लाकाबिल । न्हूम्ह प्रशिक्षक थोमस टुकेलया नेतृत्वय् चेल्सीया लागिं न्हापांगु जित बीत सिजर अज्पीलीक्वेटा व मार्कस अलन्सों १÷१ गोल यात । वंगु चान्हय् जूगु मेगु कासाय् टोटनह्याम हट्सपरयात ब्राइटनं १–० गोलं बुकूगु दु । अथे हे, लिड्स युनाईटेडं लेष्टर सिटीयात ३–१ गोलं बुकाबिल ।
वंगु चान्हय्या कासात धुंकाः इंग्लीश प्रिमियर लिग फुटबलया ल्याः धलखय् २० कासां ४४ ल्याः मुंकूगु म्यान्चेस्टर सिटी शिर्ष थासय् दुबलय् २१ कासां ४१ ल्याः मुंकूगु म्यान्चेस्टर युनाईटेड निगूगु अले ४० ल्याः मुंकूगु लिभरपुल स्वंगूगु थासय् दु । प्यंगूगु थाय्या लेष्टर सिटीया ३९ ल्याः दुसा ३५ ल्याःलिसें वेष्ट ह्याम युनाईटेड न्यागूगु थासय् दु ।