छगः यात्रुवाहक बसय् मिँच्यायेवं क्यामरुनय् ५३ म्ह मनू सीगु दु। अथेहे २९ म्ह मनूत गम्भीर घाःपाः जूगु दु।

पेट्रोलियम पदार्थ ज्वना वःगु ट्यांकर नाप ल्वाना बसय् तक मिँ च्याःगु खः ।उगु दुर्घटनाय् सीपिनिगु शव च्याना म्हसिइके हे थाकूगु दु धका स्थानीय अधिकारीपिन्स धाःगु दु ।

देय् या मध्य पश्चिमी थासय् क्लिफ अफ डिस्चाङ धइगु थासय् स्थानीय ई कथं म्हिगः बुधवाः न्हिनसिया ३ः३० बजे दुर्घटना जूगु धका अधिकारीपिन्स धाःगु खः। उगु दुर्घटना जूगु बसय् ७० गू सिट दुगु खः ।

सरकारी अधिकारीपिन्स दुर्घटनाया बारेय् अनुसन्धान जूयाच्वंगु जानकारी बिःगु दु। प्रारम्भिक विवरण कथं पेट्रोलियम पदार्थ ढुवानी याइगु ट्यांकरया चालकं नियन्त्रण गुमे यायेवं दुर्घटना जूगु धका धाःगु दु ।

Categorized in अन्तर्राष्ट्रिय