आरसिटीया ४–२ गोलं नयाँबस्तीयात त्याकल
सिल्लाथ्व त्रयोदशी ११४१, फागुन १३ बिहीवाः
सहिद स्मारक ‘बी’ डिभिजन लिग फुटबलय् रानीपाखेरी कर्न टिम आरसिटीं याउँक्क त्याकेत ताःलागु दु ।
विहीबा जूगु कासाय् १०म्ह कासामी लिकूंगु आरसिटीं नयाँ बस्ती युवा क्लबयात ४–२ गोलं बुकल ।
सातदोबाटोया एन्फा कम्प्लेक्सय् जूगु धेँधेँबल्लाखय् खूगु मिनेटय् अजित गुरुङं पेनाल्टी पाखें छगोल याना आरसीटीयात न्ह्यःने यंकूगु खः ।
कासाया १९गू मिनेटय् गणेश हमालं गोल याना नयाँबस्तीयात १–१ या ज्वंलिंज्व यात । कासाया ५०गू मिनेटय् सचु गुरुङं छगोल याना नयाँबस्तीयात २–१ यात ।
अथेहे ६६गू मिनेट आरसिटीया सुरेन खवासं गोल याना २–२ गू गोलया ज्वंलिंज्व यात ।
६८औं मिनेटय् आशिष चापागाईंयात न्ह्यांगु कार्ड नःबले आरसीटी १०म्ह कासामी लिकुन । कासाया ८३गू मिनेटय् विश्व थापां गोल यासें आरसिटी ३–२ लिं न्ह्यःने लात ।
थ्वः लिपा आरसिटीया हे अजितं ८५गू मिनेटय् मेगू छगोल तना आरसिटीयात ४–२ या अन्तरं त्याकेत ताःलात ।
कासा त्यायेधुंका आरसिटी लिगया न्यागूगु थासय् थाहाँ वंगु दु । आरसिटीया ७गू कासां ९गू ल्या तंगु खः ।
