कोरोनाविरुद्धया भ्याक्सिनया १० लाख डोज नेपाः दुहांवल । लिसें वइगु बुधबाः १४ गतेनिसें देय्न्यंकया थीथी खोप केन्द्रपाखें वितरण नं याइगु जुल ।

आःया नितिं देय्न्यंक करीब ३ सः अस्पतालयात हे खोपकेन्द्रया रुपं संचालन याइगु नं जूगु दु । कोरोनाभाईरस संक्रमणयात नियन्त्रणय् काय्त अग्रपंक्तिइ खटे जुयाः ज्या याइपिं चिकित्सक, स्वास्थ्यकर्मी, सहयोगी, एम्बुलेन्स व शव बाहन चालक, कोरोना संक्रमणं मदुपिनिगु शव व्यवस्थापनय् खटे जुइपिं सुरक्षाकःमि अले सरसफाइलय् खटे जुइपिं सरसफाइकःमितय्त न्हापांगु चरणया खोप बीगु जूगु दु ।

न्हापांगु चरणया खोप छवाः दुने बीधुंकेगु लक्ष्य नेपाल सरकारं काःगु दु । आः न्हापांगु चरणय् १० लाख डोज खोप हे बीगु धइगु खःसा प्रत्येक खोप केन्द्रयात ३ हजार ३ सय ३४ डोजया ल्याखं भाग थइ । थ्व जनसंख्या व संक्रमणया अवस्था स्वयाः च्वय्क्वय् जुइफुगु खँ जुल । तर थ्व ल्याखं हे छकः ल्याःचाः याना स्वल धाःसा छगू खोप केन्द्रं न्हिं ४ सय ७६ स्वयां अप्वः खोप बीमाली ।

खतुं थ्व तःधंगु ल्याः मखु । आःया अवस्थाया ल्याखं नं यक्व ताय्काच्वने नं मज्यू । तर नेपाःया ज्या याय्गु पहः, प्रणाली स्वय्बलय् धाःसा शंका याय् थाय् मदु नं धाय् फइमखु । महामारीं अप्वः ई काःलिसे अर्थतन्त्रय् लिच्वः लाइगु व लिपा वनाः भाईरसं स्वयां आर्थिक समस्यां दुःख बीगु सम्भावना अप्वयावनी । अथेजूगुलिं फक्व याकनं थुगु समस्यां पिहांवयाः सामान्य जीवनय् लिहांवनेगु अले लकडाउन, महामारीं स्यंकूगु अर्थतन्त्र सुधारय् योगदान बियाः न्ह्याःवनेगु लकस दय्केत सकलें सक्रिय जुइमाःगु अवस्था दुसा मेखे नेपाः थुज्वःगु देशय् नि याकनं महामारीया अवस्था, ग्याःचिकुं पिहांवय् फय्केमाःगु खनेदु । छगू ला विकाशशील देय् ।

कोरोनाविरुद्धया खोप तक नं मेपिन्सं बीला धकाः आश यानाच्वनेमाःगु देय् । आः खोप हे मेगु देय्याके फ्वनाच्वनीगु, खोप न्याय्त धेबा नं जनतायाके फ्वनाच्वनीगु झीगु देय्या सरकारयाके निम्ह नेता ल्वानाः चुनाव याय्त धाःसा गाक्क धेबा दु, दलतय्के लाखौं मनू मुंकाः ला जा नकाः सभा समारोह याः जुइत गाक्क धेबा दु । थ्व मेगु खँ जुल का । उकिया नापं संक्रमण नियन्त्रण याय्त भूमिका म्हितेमाःगु सरकारं हे लाखौं मनू मुंकःजूगु दु । छं छु मनू मुंकाः, मनू गुकथं मुंकेगु धकाः ला जिं क्यने का धकाः छम्हं मेम्हेसित हाथ्या ब्युब्युं फक्व अप्वः मनू मुंकेत स्वयाजूगु दु । जनस्वास्थ्यविद्त मास्क ति, सामाजिक दुरी कायम या धकाः हाहां सः सुइधुंकल जुइ ।

आम नागरिकया ला वास्ता मदु मदु, थज्याःगु अवस्थाय् ततःधंगु सभा समारोह यानाः जिम्मेवार दल, नेता अले प्रधानमन्त्रीं तक गज्याःगु बहादुरी क्यनेत्यंगु खः व वय्कःपिन्सं हे स्यू । थुलि जिम्मेवार नेतातय्गु ल्हातय् झीगु देय्या नेतृत्व लानाच्वंगु दु धासेंलि झीगु देशय् नि याकनं खोप वितरण याय्मफुत धाःसा अवस्था छु जुइ धाय्थाकु ।