अफगानिस्तान जलालावादय् स्वम्ह मिसा सञ्चारकर्मीयात गोलिं कयेकाः स्यानाबिल
सिल्लागाः चौथीगा ११४१, फागुन १९ बुधवाः
अफगानिस्तानया जलालावादय् स्वम्ह सञ्चारकःमि मिसायात गोलिं कयेकाः स्यानाब्यूगु दु ।
तालिवानी लडाकूतय् बिस्कं बिस्कं आक्रमणय् लानाः छम्ह घाःपाः तकं जूगु बीबीसीं न्ह्यथंगु दु ।
स्थानीय टेलिभिजनय् ज्या याइम्ह उम्ह मिसा १८ दँनिसें २० दँ दुनेयाम्ह जूगु धाःगु दु । घटनाय् ल्हाः दुगु आशंकाय् सुरक्षाकःमिं छुं मनू ज्वंसां सुनां नं घटनाया भाला काःगु मदुनि ।
तालिवानीं हताः याःगु अनया सरकारी अधिकारीतय्सं न्ह्यथंगु दु । लिपांगु दच्छि दुने तालिवानी लडाकूतय्सं थीथी ख्यःया मनूतय्त आक्रमण यानाच्वंगु अन्तर्राष्ट्रिय समाचार संस्थातय्सं न्ह्यथंगु दु ।
वंगु लाय् जक सर्वोच्च अदालतया निम्ह न्यायाधीशयात राजधानी काबुलय् गोलिं कयेकूगु खः । थुखे, राष्ट्रपति अशरफ घानीं तालिवानी विद्रोहीयात नियन्त्रणय् कायेत सरकार जानाच्वंगु धयादीगु दु ।
वय्कलं तालिवानीं देय् कब्जा याये मफइगु दावी यानादिल ।
अमेरिकां थ्वयां न्ह्यः याःगु सम्झौताकथं थः सेना लित सःतेगु व अफ्गान सरकारया नियन्त्रणय् दुपिं तालीवानी लडाकूत रिहा जुइधुंकाः तालिवानीतय्सं हाकनं आक्रमणयात तच्वयेकूगु खः । अफगानिस्तानय् अझं २द्वःत्या स्वयां आपाः अमेरिकी सेना ज्या यानाच्वंगु दु ।
