अपसं च्वनाः धर्म लाइ
पन्नारत्न महर्जनं | पोहेलाथ्व दशमी ११४१, माघ १० सनिवाः
(थुगु च्वसु पन्नारत्न महर्जनं च्वयाद्यूगु सफू ‘अन्धविश्वासय् लिकुनाच्वंगु’ या न्हापांगु ब्वपाखें छगू विषय ल्ह्ययाकयागु जुल । झीगु समाजय् विश्वासया रुपय् ल्यनाच्वंगु सामाजिक धार्मिक मान्यता व प्रचलनया दुने सुलाच्वंगु वैज्ञानिक आधार व कारणया मालेकुले याय्कथं थुगु च्वसुयात इलय्ब्यलय् न्ह्यब्वयेगु जिमिगु ग्वसाः खः । व हे ग्वसाः कथं अपसं अथवा व्रत च्वनेगु धार्मिक प्रचलन वा विश्वासया दुनेया विज्ञान छकः थुगु च्वसुपाखें थुइकेगु कुतः याय् ।)
नसा मनसें मनू यक्व म्वानाच्वने फइमखु । न जक नयाः नं उसाँय् बांलाक हनाच्वने फइमखु । नय्गु नसा सन्तुलित मजुल कि उसाँय् गडबड जुइ । नसा अप्वः नयाः जिवय् माःगु सिकं अप्वः तागत दत व खर्च मजुल कि उतुउतु ल्ह्वनाः सने हे मफय्यः । नसा नय्गु म्ह्वः जुयाः तागत म्ह्वः जुल कि नं नाः तागत जुयाः सने फइमखु । थथे जुइगु निगू पक्षं जिउ (शरिर) यात मज्यू । अथे जुयाः नसा नय्बलय् हे सन्तुलित यानाः नय्माः ।
सुं नं प्राणीया जिउ बल्लाना च्वनीगु व बमलाइगु हे नसा नय्गुया म्हालासालां यानाः खः धयागु सीदु । थथे जिउ बल्लाय्त माःगु नसा नय्बलय् नं जिउयात बिचाः यानाः नय्माः । अथे नय्मफुत धाय्वं जिउयात मदय्क मगाःगु नसा हे नं विष जूवने यः ।
जिउयात माक्वसिकं अप्वः तागत दयावल धाय्वं सनां सने मफय्क ल्ह्वनीगु व थीथी कथंया ल्वय् नापं जुया बीयः । अथे जुयाः ल्ह्वंगु म्ह्वः याय्गु स्वय्माः । थ्वया लागि नसा नय्गु म्ह्वः यानां जिलला, छुं ई तक मनसे च्वनां जिलला बाय् ज्या अप्वः यानां जिलला, छु जिइ थें च्वं उकथं याय्गु याय्माः ।
ज्या याय्बलय् नय् पित्याना वइगु स्वभाविक जुइ । पित्यात कि मनसे च्वने फइमखु, नय्गु स्वइ । थुकिं अप्वयाच्वंगु तागत म्ह्वः जुइमखु । बरु ल्ह्वंगु ल्ह्वनं तुं जुयाः उसाँय् नं स्यने भाय्प्वः भिना मवनेफु ।
थौंकन्हय् अप्वः धयाथें मनूतय् ल्ह्वनाः उतुउतु जुल धाय्व डाइटिङ्ग धकाः म्ह्वः जक नय्गु याइ । मर्निङ्ग वाक धकाः सुथ न्हापां चाःहिलेगु याइ । न्हापा न्हापा थज्याःगु चलन मदु । आः थें उसाँय् परिक्षण याय्गु थीथी कथंया साधन श्रोत नं मदु । सकलें ज्याय् लगय्
जुयाच्वनी । जिवय् तागत अप्वः म्ह्वः जूगु वास्ता दयाच्वनी मखु । डाइटिङ्ग याय्गु ख्याल नं यानाच्वनी मखु । गुकिं यानाः मनूतय् उसाँय् स्यं भिं तक नं सीके फयाच्वनी मखु । थज्याःगु खँयात बिचाः यानाः सकसिनं नालाकाय् छिनिइ कथं झी पूर्खापिसं अपसं च्वनेगु चलनयात प्रतिपालन याकातःगु जुइफु । अपसं च्वन धाय्व धर्म लाइ धयाः धर्मयात न्ह्यलुइकाः थुकियात पालन याकातःगु जुइफु । उकिं हे अपसं च्वनेबलय् थःगु क्षमता अनुसार गुलि मनसे च्वनेफु उगु कथंया प्राबधान दय्कातःगु जुइ । वाःपतिकं, बाःछिइ छकः, लय् छकः, लछियंकं व आकलझुकल कथंया अबसरत दय्कातःगु थुकिया उदाहरण जुयाच्वंगु दु । थम्हं गुुगुपती मानय् याय्फु उगु मानय् याय्त न्ह्याम्हसितं छुट दु ।
धर्म याय्गुया परिभाषा सुखशान्ति जुइकेत खः । जिवय् छुं कथंया कस्ट आदि मजुइकेत खः । ल्वय् मजुइकेगु धयागु हे सुख शान्ति जुइकेगु खः । छुं गथें जुयाः जिवय् नसाया सन्तुलन गडबड जुयाच्वंगु दःसां अपसं च्वनेबलय् सन्तुलनय् वय्केत ग्वाहालि जूवनी । अथे जुयाः हे अपसं च्वनाः धर्म लाइ धयातःगु खः । अपसंयात थुकथं धर्मनाप स्वाकातःसां जिवय् तागत मगाःपिं अपसं च्वन धाय्व नातागत जुयाः बेहोस जुइगु अबस्था वय्यः । उकें थज्याःपिं अपसं च्वने हे माः धकाः प्रावधान दय्कातःगु मदु ।
