अफगानिस्तानय् दूगु अमेरिकी सेना लितसःतिगु बाइडेनया धापू
चौलाथ्व तृतीया ११४१,बैसाख २ बिहीवाः
अमेरिकी राष्ट्रपति जो बाइडेनं अमेरिकां दक्वःलय् ताहाकःगु ल्वापु अन्त्य यायेत मे १ निसें अफागानिस्तानय् दूगु थः सेना लितसःतेगु घोषणा यानादीगु दु ।
सन् २००१ य् अमेरिकास्थित विश्व व्यापार संगठनया भवनय् जूगु हताःया २०क्वःगु वार्षिकी नापं आतंकवादविरुद्ध ल्वायेत अफगानिस्तान छ्वगु थःगु सेना लितसःतेगु न्ह्याकेगु राष्ट्रपति बाइडेनं धयादीगु खः ।
अलकायदा पुचःलं हताः याःगु नापं अमेरिकां हलिंयंक आतंकवादविरुद्ध ल्वायेगु धका अफगानिस्तानय् थःगु सेना छ्वगु खः । अफगानिस्तानय् आः २५सःम्ह अमेरिकी सेना व थ्यंमथ्यं ९ द्वः व ६सःम्ह उत्तर एटालान्टिक सन्धि संगठन (नाटो) सम्बद्ध सैनिक दूगु धाःगु दु ।
थ्वयान्ह्यः पूर्व राष्ट्रपति डोनाल्ड ट्रम्पं नं अफगानिस्तानय् शान्ति वार्ता याना थःगु सेना लितसःतेगु कुतः न्ह्याकुसा नं आन्दोलनरत व सरकारी पक्षया अविश्वासया हुनिं अफगानिस्ताया शान्ति वार्ता न्ह्याये मफूगु खः ।
उगु ईलय् सरकारं बन्दी दयेकुपिं तालिवानी लडाकु व विद्रोहीं नियन्त्रणय ् काःपिं सेना व सर्वसाधारणयात छुं सर्त मतसें लितसःता वार्ताया लकस दयेकेगु धाःगु जूसा नं पूवने मफूगु खः ।
