बिस्का जात्रा न्ह्याकेगु धासें ख्वपय् ब्वज्याय्
लहानान्युज | चिल्लागा नवमी ११४१,चैत्र २४ मंगलवाः
ख्वपया तःमारीइ बिस्का जात्राया पक्षय् स्थानिय मनूतय्सं ब्वज्या याःगु दु । जिल्ला प्रशासन ज्याकू ख्वपं कोरोनाया त्वहःचिनाः जात्रा याकेमबीगु धायेवं स्थानिय मनूत उगु निर्णयया विरुद्धय् विरोध ब्वज्याय् कुहाँवःगु खः ।
छुं दिं न्ह्यः जिल्लास्तरीय कोभिड–१९ संकट व्यवस्थापन सञ्चालन केन्द्र, डिसिसिएमसीया मुँज्यां बिस्का जात्राय् प्रतिबन्ध तयाः औपचारिकता पूजाय् लिकुंकेगु निर्णय याःगु खः ।
केन्द्रया कजि व प्रमुख जिल्ला अधिकारी प्रेमप्रसाद भट्टराईया कजिसुइ जिल्ला समन्वय समिति, नेपाली सेना, नेपाल प्रहरी, सशस्त्र प्रहरी, राष्ट्रिय अनुसन्धान विभाग, गुठी संस्थान, जिल्ला स्वास्थ्य ज्याकूया प्रतिनिधिपिन्त दुथ्याकाः निर्णय याःगु खः ।
तर उगु मुँज्याय् स्थानिय गुथि व खलः पुचःया प्रतिनिधिपिन्त दुमथ्याकू । जात्रा पर्व यायेमाःपिन्त दुमथ्याकूसें एकती ढंगं निर्णय याःगु धासें स्थानिय मनूत आक्रोशित जूगु खः । स्वस्फूर्त ब्वज्याय् कुहाँवःपिन्सं सभा, जुलुस व रङ्गशालाय् कासा म्हितकीबलय् कोरोन मपुनीगु तर जात्राय् जक गथे पुनी धकाः न्ह्यसः थंगु दु ।
स्थानिय प्रशासनं नियोजित ढंगं जात्रा पर्व न्हंकेत निर्णय याःगु न धागु दु । ब्वज्याय् कुहाँवःपिं ख्वप व थिमिया स्थानिय मनूतय्सं जात्रा मयाकेगु प्रशासनया निर्णय स्वीकार मयायेगु धागु दु ।
Categorized in राष्ट्रिय
