लकडाउनबारे सहलह नितिं स्वंगु जिल्ला प्रमुखपिनिगु मुँज्या जुइगु
लहनान्युज | चौलाथ्व चतुर्दशी ११४१,बैसाख १३ सोमवाः
स्वनिगःया ३गू हे जिल्लाया प्रमुख जिल्ला अधिकारीपिनि मंका मुँज्या च्वनेत्यंगु दु । येँ, यलः व ख्वपःय् सक्रिय संक्रमितया ल्याः अप्वःगु नापं आः न्ह्याकेगु पलाःया खँय् निर्णय यायेत मंका मुँज्या च्वनेत्यंगु खः ।
येँया सीडीओ ज्याुकिथइ च्वनिगु मुँज्यां अप्वःयावंगु संक्रमण रोकथामया नितिं न्ह्याके फइगु पलाःया खँय् निर्णय याइगु धाःगु दु । थांैंया मुँज्यां अप्वःगु संक्रमण पनेत स्वनिगःलय् छुं दिंया नितिं लकडाउनया निर्णय जुइ फइगु धाःगु दु ।
सक्रिय संक्रमितया ल्याः उच्च दूगु व जोखिम अप्वयावंगुलिं स्वनिगःया फुक्क जिल्लाय् लकडाउन यायेगु वा मयायेगु विषयलय् निर्णय यायेत मुँज्या च्वनेत्यंगु धाःगु दु । आः स्वनिगःलय् सक्रिया संक्रमितया ल्याः ९ सः सिवें आपा दु ।
थुुगु ल्याः सिसिएमसीं क्वजिउगु मापदण्ड सिव्ें आपा खः । कोभिड १९ या संक्रमण भयावह जुयावनेधुंका आइतबाः च्वंगु कोभिड संकट व्यवस्थापन केन्द्र (सीसीएमसी) या मुँज्यां संक्रमितया ल्याः स्वया निषेधाज्ञा यायेत स्थानीय सरकारयात अधिकार बिइमाःगु सिफारिस केन्द्र सरकारयात याःगु दु ।
सीसीएमसीं पहाडी क्षेत्रय् निसःम्ह संक्रमित व सहरी क्षेत्रय् ५ सःम्ह सक्रिय संक्रमित जूसा निषेधाज्ञा यायेत सिफारिस याःगु खः । स्वास्थ्य तथा जनसंख्या मन्त्रालयया कथं येँ नापं देय्या थी थी ९गू जिल्लाय् आइतबाः तक्क ५सः सिवें आपाः सक्रिय संक्रमित दु ।
थुखे कोभिड–१९ संकट व्यवस्थापन केन्द्र (सीसीएमसीं) कोरोना भाइरस (कोभिड–१९) संक्रमणया चेन ब्रेकया नितिं निषेधाज्ञा यायेत सिफारिस याःगु दु । सीसीएमसीया म्हिगः च्वंगु मुँज्यां पहाडय् २ सः व शहरी क्षेत्रय् ५ सःम्ह सक्रिय संक्रमित खनेदूसा अवस्था स्वया लकडाउनया खँय् निर्णय यायेगु अधिकार जिल्ला कोभिड–१९ संकट व्यवस्थापन केन्द्र ‘डीसीसीएमसी’ यात बिइत सिफारिस याःगु दु ।
मुँज्याय् लकडाउन यायेगु कि मयायेगु बहस जूगु खः । स्वास्थ्य तथा जनसंख्यामन्त्री हृदयेश त्रिपाठीं हट स्पटय् लकडाउन यायेमाःगु मत तयादीगु खः । तर सीसीएमसीया कजि लिसें उपप्रधानमन्त्री ईश्वर पोखरेललिसेयापिन्सं देय्यंक लकडाउन याये मज्युगु धिनां तःगु खः ।
स्वनिगःया ३गू हे जिल्ला नापं मोरङ, पर्सा, कास्की, दाङ, बाँके व रुपन्देहीइ संक्रिय संक्रमितया ल्याः ५ सःम्ह पुलावंगु दु । अथेहे सीसीएमसीं थौंनिसें विश्वविद्यालय व ब्वनेकु तगिंया फुक्क परीक्षा स्थगित यायेत सिफारिस याःगु दु । थ्वयान्ह्यः मन्त्रिपरिषद मुँज्यां न्ह्यानाच्वंगु परीक्षा मदिकेगु निर्णय याःगु खः ।
तर परीक्षाया नामय् म्वःम्वः जूगु व कक्षा सञ्चालन जूगु धासें सीसीएमसीं फुक्क परीक्षा दिकेगु निर्णय याःगु खः ।
