चुनौती दुने अवसर लुइकाच्वंम्ह : लहना
सुरेन्द्रभक्त श्रेष्ठ | बछलागा षष्ठी ११४६, बैसाख २४ बिहीवाः
नेपालभाषा व नेपाली पत्रकारिता ख्यलय छगू बिस्कं हे थाय् कायेत ताःलागु नां खः –लहना। भाषा, कला, संस्कृति सम्पदा व आर्थिक नाप स्वानाः न्ह्यज्यानाच्वंगु नां खः –लहना। झीगु सकलसिगु प्रतिनिधित्व कथं मदिक्क पिदनाच्वनेत ताःलाम्ह खः – लहना। संचार ख्यलं जनचेतना अभिबृद्धी यायेगु ज्याय गुबलें नं उसिंमचासें मदिक्क पिदनाच्वंगु पत्रीका खः – लहना।
नेपाल संवत् ११३३ (२०७० फागुन २७ गते) मंगलवाः पिदंगु थुगु लहना निरन्तर १२ दँ फुनाः १३ दँय पिदनाच्वंगु दु। थ्व १२ दँ दुने गुलि चुनौती वःगु दुसा उलि हे अवसर न वःगु दु।
थुकिइ सकल भाषाह्यमिपिं, भिंचितामिपिनिगु हःपाः व मतिना गुबलें नं ल्वःमंके फैमखु लहना पुचलं ।
लहना ‘ब्यवसायिक पत्रकारिता– थौंया आवश्यकता’ धैगु नारा ज्वनाः पिलू वयागु खः। स्वंगू दशक न्ह्यः बिश्वभूमि न्हिपौ निसें थौं तक निरन्तर बजार ब्यवस्थापक जुयाः ज्या यानागु अनुभवं लहना ब्यवसायिक रुपं पिदनाच्वंगु जुल।
२०७२ सालय तःभुखाय् ब्वःगु इलय् लहना पिथनेत भतिचा थाकूगु खःसा २०७३ सालय् नाकाबन्दी जूबलय् हाकनं पत्रिका निरन्तर यायेगुलिइ हे चुनौती वःगु खः। हाकनं २०७६ सालय कोभिड १९ या महामारी ब्वलंगु खःसा प्यदँ तक निरन्तर यायेत चुनौती वःगु खः। उगु इलय् यक्व हे पत्रिका दिउगु खःसां लहना निरन्तर पिदना हे च्वंगु दु उकिया मू कारण धैगु हे लहनायात माया मतिना याइपिं भिंचिता मिपिनिगु हःपाः व तिबः दुगुलिं हे खः।
वंगु २०८२ भाद्र २३–२४ गते जूगु जेनजी आन्दोलनं हाकनं छकः पत्रिका निरन्तर यायेत चुनौती वःगु खःसा यँयाः जात्रा हे अनिश्चितकालीन कफ्र्यु दुने क्वचाःगु खः। उकिं यानाः मोहनी व स्वन्ति नं यक्व हे चुनौती वःगु जुल।
अनं लिपा २०८२ फागुण २१ गते जूगु आमनिर्वाचनं बालेन न्हूम्ह प्रधानमन्त्री जूगु खःसा छुं ई लिपा हे नेपाःया चौथौं अंग संचार ख्यः हे धरापय लाकेगु नीति ज्वनाः नेपाल सरकारपखें छुं हे सरकारी बिज्ञापन मबिइगु निर्णय यात । उकि यानाः हाकनं छकः तःधंगु चुनौती सामना यायेमाःगु अवस्था वःगु दु। जिपिं आः नं आशावादी हे तिनी छाय्धाःसा थीथी इलय यक्व हे चुनौती पार यानावये धुंकागुलिं थौंया थुगु विषम परिस्थिति नं छिकपिनिगु माया मतिना व हःपाः दया हे च्वनी धैगु भलसा कयाच्वना।
