कोरना खोप ईलय् हे वइगु सरकारया दावी
डंगोल | चर्तुदशी थिंलागा, ११४१ (२०७७ पौष २८ गते) मंगलबाः
सरकारं नेपालय् पौने २ क्वःति डोज कोरोनाया खोप भण्डारण यायेफइगु क्षमता विस्तार यानागु न्ह्यथंगु दु ।
स्वास्थ्य मन्त्रालयं म्हिगः याःगु पत्रकार सम्मेलनय् स्वास्थ्य मन्त्रालयया सचिव लक्ष्मण अर्यालं देय्न्यंक २ निसें ८ डिग्री तापक्रमय् तयेफइगु १ क्वःति ७७ लख डोज खोप भण्डारण यायेगु क्षमता विस्तार जूगु जानकारी बियादिल ।
खोप प्राप्त जूगु ७न्हु दुने वितरण याये फइगु कथं तयारी जूगु धासें सचिव अर्यालं माइनस २० डिग्री तापक्रमय् तयेमाःगु खोप तकं ३ प्रतिशत भण्डारण यायेफइगु क्षमता थकयागु धयादिल ।
स्वास्थ्य तथा जनसंख्या मन्त्री हृदयेश त्रिपाठीं कोरोनाविरुद्धया खोप इलय् हे नेपालय् हयेगु दावी यानादिल ।
मन्त्री त्रिपाठीं खोप हयेगु प्रकृया यक्व न्ह्यःने वनेधुंकूगु व राजनीतिक अले कूटनीतिक प्रकृया तकं न्ह्यःने वनेधुंकूगु धयादिल ।
खोप हयेगु प्रकृया पारदर्शी जुइगु धासें मन्त्री त्रिपाठीं सितिकं वितरण जुइगु जानकारी बियादिल ।
देय्न्यंक दुगु १६द्वः खोप केन्द्र व ५द्वः जनशक्तियात परिचालन यानाः खोप अभियान न्ह्याकेगु मन्त्री त्रिपाठीं धयादिल ।
खोप गबले वइगु व न्हापांगु चरणय् गुलि प्रतिशत हयेगु धइगु बारे धाःसा जानकारी मयाकूनि ।
Categorized in राष्ट्रिय
