एसियाया थीथी थासय् छक्वलं भुखाय् ब्वल
लहनान्युज | सिल्लाथ्व द्वितिया ११४१, फागुन १, शनिबाः
दक्षिण एसियाय् थीथी थासय् छक्वलं भुखाय् ब्वःगु दु । ताजकिस्तान व चीनया सिचुवानय् भुखाय् ब्वःगु खः ।
नेशनल सेन्टर अफ सिस्मोलोजीया कथं ताजकिस्तानय् ६.३ म्याग्निच्यूटया भुखाय् ब्वःगु धाःगु दु । थुखे अमेरिकी भौगर्भिक सर्भें ५.९ म्याग्निच्यूटया जूगु धाःगु दु ।
उगु भुखाचं ताजकिस्तानय् गुलि क्षति जूगु वा मजूग धैगु छु नं विवरण वःगु मदुनि । तर थुकिया धक्का कश्मीरनिसें दिल्लीतक्क नं महसुस जूगु धाःगु दु ।
अफगानिस्तान व पाकिस्तानया पेशावर, इस्लामावाद लाहोरय् तक्कं भूखाचंया धक्का महसुस जूगु धाःगु दु ।
भुखाचया हुनिं भारत कश्मीरया यक्वः छेँ स्यंगु व अमृतसरया छखा छेँ दुंगु बीबीसी न्ह्यथंगु दु । पन्जाबया मुख्यमन्त्री अमरिन्दर सिंह धाःसा भुखाचं क्षति मजूगु जानकारी बिउगु दु ।
जम्मू कश्मीरया पूर्वमुख्यमन्त्री उमर अब्दुल्लां सन् २००५ लिपा थुकथंया धक्काया महसुस न्हापांगु जूगु धाःगु दु ।