यलःय् होली पुन्हिया दिंसं हरिसिद्धि देवीया तान्त्रिक गणनृत्य क्यन, ख्वपय् नं मिजं व मिसाया जनेन्द्रिय ल्वाका हन
राम डंगोल | चिल्लाथ्व प्रतिपदा, ११४१ चैत्र १६ सोमबाः
यलःया दक्षिणी लागाया जलदेय्या ऐतिहासिक हरिसिद्धि देवीया तान्त्रिक गणनृत्य म्हिगः क्वःचागु दु । हरिसिद्धि देवीया द्यगः न्ह्यने उगु नृत्य क्यंगु खः ।
हरेक दँया होलि पुन्हि व यःमरि पुन्हि दिंलय् हरिसिद्धि देवीया नृत्य क्येनेगु परम्परा दु । थीथी झ्वलय् केनिगु नृत्य क्येनेधुंका किसकिन्धा नरेश बालीयात स्यायेत रामं त्रिशक्तिदेवी हरिसिद्धिया तान्त्रिक साधना याःगु नृत्य क्येनेगु याई ।
ब्रम्हायणी, बैष्णवी व रुद्रायणीया त्रिशक्ति व योगिनीया रुपय् हरिसिद्धियात काइगु याः । हरेक १२दँय् गोदावरी तान्त्रिक साधना याना पशुपतिया शिवलिंगय् तकं तान्त्रिक पूजा याना स्वनिगःया २५गू थासय् नृत्य केनिगु चलन दु ।
थ्वहे झ्वलय् ख्वपःय् नं मेगु हे कथं होली पुन्हि नखः हन । ख्वपःय् फागुन शुक्ल अष्टमीया दिंनिसें न्ह्याइगु होली दत्तात्रय द्यःग लिकसंया भिमसेन मन्दिरय् न्यायेकावयाच्वंगु दु ।
द्यःगलय् यःखानातःगु मिजं व मिसाया जनेन्द्रियया प्रतीकयात ल्वाका होली पुन्हि न्याकेगु चलन दु । होली पुन्हिया दिं ल्याम्हपिनि यःम्ह ल्यासेया छेँय् वना म्ये हाला मतिनाया प्रस्ताव तयेगु व ल्यासेयात यल धाःसा न्यतालय् अबीर तयाबिइगु व मयःल धाःसा तापाक्क हे अबीर ह्वला लिहाँ वनेगु चलन तकं दु । भीमसेनया लिङ्गया प्रतीकयात ब्रह्मायणी खुसीइ यंका सफा यायेवं ख्वपःय् होली विधिकथं क्वःचाई ।
थ्वझ्वलय् म्हिगः वसन्तपुरय् स्वानातःगु चीरयात क्वथला थुगुसीया हाली नखः क्वचाःगु दु । फागुन शुल्क अष्टमीया दिनय् स्वाःना न्ह्यागु चीर क्वथलेवं होली क्वचाइगु पौराणिक मान्यता दु ।
फागु पुन्हिया दिं हर्षबढाई याना चीर क्वथला हनुमानढोका, इन्द्रचोक, न्यूरोड जुसें टुंडिखेलय् यंका म्हिगः च्याका चीर दहन याःगु दु । म्हिगः हे तिन्ख्यःया बिचय् च्वंगु सिमाय् गुरुमापा राक्षसयात भ्वय् नं नकल ।
