भारतय् न्यंगु कोरोना संक्रमणप्रति विश्व समुदायया च्यूता, माःगु ग्वहालि यायेगु बचं
चौलाथ्व पुन्हि ११४१,बैसाख १४ मंगलवाः
विश्व स्वास्थ्य संगठन (डब्ल्युएचओ)या प्रमुख टेड्रोस एडहनम गिब्रिएसुसं भारतय् न्यंगु कोरोना महामारीया विषयस चिउता प्वंकादीगु दु ।
हलिंया आपालं देशय् छक्वःलं न्यंगु कोरोनाया बिस्कं बिस्कं झ्वया दथुइ भारतय् कोरोना महामारीं विकराल रुप काःगु धका भारतया नितिं डब्ल्युएचओं अक्सिजन व मोबाइल फिल्ड अस्पताल आपूर्ति यायेगु न्ह्यथनादील ।
गिब्रिएसुसं भारतया जनतां अक्सिजन अभावया हुनिं धमाधम ज्यान त्वफिकुगुलिइ दुःख प्वंकुसें डब्ल्युएचओं भारतया नितिं स्वास्थ्य उपकरण चूलाकेगु प्रतिवद्धता प्वंकादीगु दु । भारतय् लिपांगु ६ वा दुने कोरोना महामारी अप्वःयावंबलय संक्रमण व मृत्यु दर छक्वःलं थाहाँवनेधुंका डब्ल्युएचओं चिउता प्वंकुगु खः ।
थ्वहे दथुइ फेसबुकया संस्थापक मार्क जुकरबर्गं कोरोना महामारी न्यंगु देय्या नितिं छगू कोति डलर ग्वहालि यायेगु घोषणा यानादीगु दु । जुकरबर्गं भारतय् न्यंगु कोरोना महामारीप्रति चिउता प्वंकुसें युनिसेफलिसे नापं जाना भारतयात ग्वहालि यायेगु प्रतिवद्धता न्ह्यथनादीगु खः ।
भारतय् कोरोनाया हुनिं आःतक्क छगू लख ९७ द्वः व ८ सः सिवें आपा सिइधुंकुगु दुसा संक्रमितया ल्याः छगू कोति ७६ गू लख २५ द्वः व ७ सःम्ह थ्यंगु दु ।
Categorized in अन्तर्राष्ट्रिय
