भारत व पाकिस्तान दथुई सीमा विवाद ज्यंकेगु कुतः
लहानान्युज | चौलाथ्व द्धादशी ११४१,बैसाख ११ सनिवाः
पाकिस्तानं भारतलिसे सीमा समस्या ज्यंकेत वार्ता यायेत स्वयागु न्ह्यथंगु दु ।
ताः इलंनिसें दुगु भारत पाकिस्तान सीमा विवाद ज्यंकेत भारतलिसे औपचारिक वार्ता यायेत स्वयागु पाकिस्तानी अधिकारीतय्सं न्ह्यथंगु अन्तर्राष्ट्रिय समाचार संस्थातय्सं धाःगु दु । निगुलिं देय् दथुइ कश्मिरया सीमा व स्वामित्वया विषयस ताः ई न्ह्यःनिसेंया विवादया हुनिं स्वापू ख्वाउँयाच्वंगु दु ।
निगू देय् दथुइया ख्वाउँगु स्वापू भिंकेत कश्मिरया समस्या ज्यंकेफइगु पाकिस्तानी अधिकारीतय्सं न्ह्यथंगु दु । कश्मिरय् भारतीय सुरक्षाकःमिं सैन्य पंगः तःगुलिसें लिपांगु इलय् सन् २०१९ निसें हे निगुलिं देय्या स्वापू झन स्यंगु खः ।
थुगु हे दँय्हे निगुलिं देयय सैन्य अधिकारीतय् दथुइ अनौपचारिक वार्ता जूगुलिसें सन् २००३ य् जारी जूगु युद्धबिरामसम्बन्धी सम्झौता पालना यायेगु बारे निगुलिं देय्या उच्च नेतृत्व दथुइ सहलह यायेगु सैन्य अधिकारीतय्सं सहमति याःगु धाःगु दु ।
कश्मिरया जनजीवन सहज दयेकाः वार्ताया लकस दयेकेमाःगुलिइ पाकिस्तानी अधिकारीतय्सं बः ब्यूगु दु । भारतीय पक्षपाखें ज्वंपिं पाकिस्तानी नागरिकयात विना शर्त रिहा यायेमाःगु, कश्मिरया जनसंख्या परिवर्तनयात दिकेमाःगु लिसेंया माग पाकिस्तानी अधिकारीतय्सं तःगु धाःगु दु ।
