२०७८ बैशाख १, बुधबार

अमेरिकाय् जोन्सन कम्पनीया छगू मात्रा जक काःसां गाइगु कोरोना खोप छ्यलेत अनुमति

लहनान्युज | सिल्लागा पारु ११४१, फागुन १६ आइतवाः

अमेरिकाय् छगू मात्रा जक काःसां गाइगु जोन्सन एण्ड जोन्सनया कोरोना खोपयात छ्यलेगुया अनुमति बिउगु दु ।
 
खोप सुरक्षित व प्रभावकारी खनेदूगु धका अमेरिकी नियामक निकाय युएस फूड एण्ड ड्रग एड्मिनिस्ट्रेसन (एफडिएं) छ्यलेगुया नितिं स्वीकृति बिउगु खः ।
 
फाइजर व मोर्डनाया खोप सिवें जोन्सन एण्ड जोन्सनया खोप खर्च व भण्डारणया हिसाबं किफायती खनेदूगु दु ।
 
थुगु खोपयात फ्रिजरय् मजुसें रेफ्रिजिरेटरय् भण्डारण यायेफइ । थुगु खोप संक्रमितयात गम्भीर अवस्थाय् थ्यनेगुपाखें ल्यंकेत ८५गू व मुक्कंलय् ६६गू प्रतिशत प्रभावकारी खनेदूगु दु ।
 
कम्पनीं जुनया अन्त्यतक्क १०गू कोति खोप अमेरिकायात चूलाकेगु प्रतिबद्धता न्ह्यथंगु दु । बेलायत, यूरोपेली यूनियन, क्यानडा व कोभ्याक्सं नं खोप अर्डर याःगु दु ।
 
बेल्जियन कम्पनी ज्यानसिनं वंगु जनवरीइ खोपया मानवीय परीक्षणया नतिजा  सार्वजनिक याःगु खः । अमेरिकाय् थ्वयान्ह्यः स्वीकृति चूलागु फाइजर व मोदेर्नाया खोप धाःसा निगू मात्रा कायेमा । 
Categorized in अन्तर्राष्ट्रिय