नेपाः व चाइनां बिश्वय् तजाःगु हिमाल गया विश्व कीर्तिमान रेकर्ड तयेत ताःलाम्ह नेपाःया मिसा पत्रकार कल्पना महर्जनयात वर्ल्ड बुक अफ रेकर्डस् दसिपौ लःल्हाःगु दु ।

उगु विशेष ज्याझ्वलय् मूपाहाँ कथं नेपाःया न्हापांम्ह राष्ट्रपति डा. रामवरण यादवं हलिंया दकले तःजाःगु ८८४८ मिटरया सगरमाथा हिमाल उत्तर व दक्षिण निगुलिं मोहडां मिसा पत्रकार कल्पना महर्जनं आरोहण यायेत सफल जुगुलि वयकःयात वल्र्ड बुक अफ रेकर्डस युकेया विश्व कीर्तिमान रेकर्डया दसिपौ लःल्हागु खः ।

पत्रकार कल्पना महर्जनं वंगु २०७५ जेठ ९ गते नेपाः व २०७६ जेठ ९ गते चीनपाखें सगरमाथाया सफल आरोहण यासें हलिंया हे दकले न्हापांम्ह सगरमाथा आरोही मिसा पत्रकारया कीर्तिमान तयेत ताःलाःगु खः । वयकलं वांगमय शताब्वदी पुरुष बरिष्ठ संस्कृतिविद् सत्यमोहन जोशीया सच्छि दँ दुगु लसताय् जोशीया किपाः सगरमाथा च्वकाय् ब्वयेकादीगु खः ।

शिक्षाया माध्यमं बालबिवाह रोकथाम अभियानया घोषणा नं यानादीगु खः । एक्सपिरियन्स आउटडोर नेपाल प्रा.लि.या रविन्द्र महर्जनं कीर्तिमानी आरोहणया संयोजन यानादीगु खः ।

यल महानगरपाखें ग्वसाः ग्वःगु उगु विशेष ज्याझ्वलय् यल महानगरया मेयर चिरीबाबु महर्जनं सभापतिया आसन ग्रहण यानादीगु खःसा उपमेयर गीता सत्यालं संयोजन यानादीगु खः ।

Categorized in राष्ट्रिय