कञ्चनपूरय् आंशिक निषेधाज्ञा
लहनान्यूज | चिल्लाथ्व दशमी, ११४१, चैत्र ११ बुधबाः
भारतय् कोरोना संक्रमण अप्वःगुलिसें नेपालया सीमावर्ती क्षेत्रय् नं प्रभाव लानावःगु दु । कञ्चनपुरय् वंगु चान्हय्निसें लागु जुइगु कथं आंशिक रूपं निषेधाज्ञा जारी याःगु दु ।
कोरोना भाइरसया संक्रमणया लहर नेपाल दुहांवइगु जोखिम दुगु धासें आंशिक रुपं निषेधाज्ञा जारी यानागु प्रशासनं धाःगु दु । कञ्चनपुरया प्रमुख जिल्ला अधिकारी रामकुमार महतों नेपाल सरकार व प्रदेश स्वास्थ्य निर्देशनालयपाखें जारी निर्देशनया लिधंसाय् जिल्लाय् क्वःज्यूगु कथंया छुं ज्या यायेत÷याकेत निषेध जूगु धयादिल ।
वय्कःया कथं गौरीफन्टा व गड्डाचौकी नाकां यात्रुतय् आवागमन व मालसामान ढुवानी सुथय् ६ताः इलंनिसें बहनी ८ताः ईतक्क खुला जुइ । थ्व बाहेकया नाका व विन्दुं आवतजावत पूवंक बन्द जुइ ।
अथे हे, नाकाय् दुगु हेल्थ डेस्कय् स्वास्थ्य जाँच याकेमाःगु व विवरण ल्ह्ययेकेत इनाप याःगु दु । निषेधाज्ञाय् होलीलिसें छुं हे मेला, पर्व, जात्रा, महोत्सव, भीडभाड वा जुलुस याये दइमखु ।
थ्व हे दथुइ, नेपालय् न्हापांगु खुसी लकडाउन जूगु थौं दच्छि पूवंगु दु । थगुने चैत ११ गतेनिसें लकडाउन न्ह्याःगु खः । करिब न्यालातक्क जूगु लकडाउन व निषेधाज्ञां नेपालया अर्थव्यवस्था ऋणात्मक दयेकूगु दु ।
Categorized in राष्ट्रिय
