२०७७ माघ ४, आइतबार

मूर्त अमूर्त सम्पदाया संरक्षणया लागिं सरोकारवाला निकाय नुगः स्याय् मज्यू

नृपेन्द्रलाल श्रेष्ठ | थिंंलागा चतुर्दशी ११४१, पुस २८ मंगलवाः

 यलया नांजाःगु कात्ति प्याखंया कोष दय्केत धकाः यल महानगरपालिकां ५० लख तका ग्वाहालि याःगु दु । कार्तिक नाच संरक्षण समितिं यल मंगलय् याःगु थुगुसीया कात्ति प्याखं समापन समारोहस महानगर प्रमुख चिरिबाबु महर्जनं कार्तिक नाच संरक्षण समितिया नायःयात किरण चित्रकारयात ५० लख तकाया चेक लःल्हानादिल ।

समापन समारोहस न्ववासें महानगर प्रमुख महर्जनं यलया मूर्त अमूर्त सम्पदाया संरक्षणयाय लागिं थःपिं जानाच्वनागु दावी यानादिल । ‘७२ सालया भुखाचं क्षतिग्रस्त यल महानगर दुनेया सम्पदाया पुनर्निर्माणया झ्वलय् गुलिं थासय् ज्या सिधःगु गुलिं थासय् ज्या जुयाच्वंगु दु,’ महानगर प्रमुख महर्जनं धयादिल । ‘महानगरं जिम्मा काःगु सम्पदा अलपत्र लाःगु मदु ।’ यल महानगरपालिका वडा नं २१ ख्वनाया ‘रुद्रायणी नाच’ व वडा नं २९ या हरिसिद्धिया जल प्याखं संरक्षणया लागिं नं आर्थिक ग्वाहालि याय्त योजना दय्काच्वनागु वय्कलं धयादिल ।

कात्ति प्याखंयात व्यवस्थित व निरन्तरताय् सहज दय्केत धकाः कार्तिक नाच संरक्षण समितिं वइगु न्यादँ दुने १० करोड तकाया अक्षय कोष स्थापना याय्गु आज्जु काःगु दु । वंगु दँय् कात्ति प्याखंया समापन समारोहस नवासें यल महानगरपालिकाया प्रमुख चिरिबाबु महर्जनं उगु अक्षय कोषय् महानगरपालिकापाखें १ करोड तका ग्वाहालि याय्गु प्रतिवद्धता प्वंकादीगु खः । व हे प्रतिवद्धता कथं महर्जनं थुगुसी ५० लख तका बियादीगु खः । महानगर प्रमुखं महर्जनं संस्कृतिया संरक्षणया लागिं महानगरपालिकाया ख्वाः जक स्वयामच्वंसे बैंक अले वितीय संघसंस्थाय् ग्वाहालि काः वनेत छ्याता बियादिल ।

बैंक अले वित्तीय संस्थां दँय्दसं सामाजिक उत्तरदायित्व अन्तर्गत छुं प्रतिशत धेबा सामाजिक ज्याय् खर्च याय्माःगु नियम दुगु धासें महर्जनं समितिं उखेपाखे नं पहल याय्त इनाप यानादिल । समितिया नायः चित्रकारं मेयर महर्जनया थगुनेया बचंयात लुमंकाब्युसें ल्यं दनिगु ५० लाख तका नं फक्व याकनं उपलब्ध याकाबीत माग यानादिल । हलिंया हे छगू उत्कृष्ट अमूर्त संस्कृतिया रुपय् दुगु कात्ति प्याखं धेबाया अभावं न्ह्याकेत थाकुया च्वंगु धासं चित्रकारं धयादिल ‘कात्ति प्यााखं ल्यंकेगु न्हापांगु  दायित्व महानगरपालिकाया खः।

अथेजूगुलिं ल्यं दनिगु ५० लाख तका नं याकनं हे हस्तान्तण जुइमा ।’ कात्ति प्याखनं देय्या विघ्नवाधा चिलावनीगु जनविश्वासलिसें ३७९ दँ न्ह्यःनिसें मदिक्क न्ह्यानावःगु धयादिल । आःतक्क छकः नं मद्यूनिगु प्याखंयात थुगुसी महामारीया अवस्थाय् नं निन्हु जक क्यनाः सां परम्परायात निरन्तरता बियागुलिइ सन्तुष्टि दुगु वय्कःया धापू खः ।

समितिया उपाध्यक्ष प्रतापधर शर्मां पारिश्रमिक मदुसां कलाकारया भावनात्मकआस्थां यानाः कात्ति प्याखं जेनतेन न्ह्यानावःगु धासें धयादिल ‘कलाकारपिन्त ई कथं ल्वय्क पारिश्रमिक बीत अक्षयकोषय् थप ५० लाख उपलब्ध याकेगुया विकल्प मदु । महानगरपालिकां ल्यं दनिगु ५० लाख तका बीगुलिइ जिमित पुर्ण विश्वास दु ।’

नेवाः पत्रकार राष्ट्रिय दबूया महासचिव सुनिल महर्जनं नगरयात म्हसिकीगु, नगरया शान जुयाच्वंगु थज्याःगु मूर्त अमूर्त सम्पदाया संरक्षणया लागिं सरोकारवाला निकाय नुगः स्याय् मज्यूगुलिइ बः बियादिल । महासचिव महर्जनं संस्कृतिप्रति राज्य व स्थानीय सरकारं गौरव याःसां व कथं संरक्षणया लागिं गाक्क स्रोतया व्यवस्था मयाःगु धयादिल । आःतक्क सम्बन्धित समुदायया अपनत्व, प्रतिबद्धता व इच्छाशक्तिं यानाः जक थनया अमूर्त सम्पदात ल्यनाच्वंगु धासें महर्जनं धयादिल ‘अमूर्त संस्कृति ल्यंकेत जीवन समर्पण याःपिं परम्परागत बाजं गुरु, कलाकार, गुथियारतय् आत्मसम्मान थकाय्त विशेष भत्ता, सम्मान व पाय्छि कथं पारिश्रमिक बीगु विषयस महानगरपालिका गम्भीर जुइमाः ।’उगु हे ज्याझ्वलय् ललितपुर उद्योग वाणिज्य संघया न्हूगु निर्वाचित कार्यसमितियात खादा क्वखाय्काः भिंतुना देछाःगु खः ।

ज्याझ्वलय् कार्तिक नाचयात थीथी कथं मदिक्क ग्वाहालि यानाच्वंगु धासें यल महानगरपालिका १६ वडाया वडाध्यक्ष निर्मलरत्न शाक्ययात सुभाय् देछासें सम्मान नं याःगु खः । वडाध्यक्षं शाक्यं थगुने नरसिंहया नितिं न्हूगु मुकुट लिसें थुगु दँय् अक्षय कोषया नितिं १० लख तका नं बियादीगु खःसा बराहया नितिं न्हूगु मुकुट दय्काः बियादीगु खः ।ज्याझ्वलय् ललितपुर उद्योग वाणिज्य संघया न्हूम्ह नायः मनोज बहादुर न्याछ्यं, निवर्तमान नायः कृष्णलाल महर्जन, पाटन संग्रहालयया प्रमुख सरस्वती सिंह, नेपाल पर्यटन बोर्डया प्रवन्धक उदय भट्टराई, महानगरीय प्रहरी प्रभाग मंगलबजारया प्रमुख रामेश्वर त्वातीलिसेंया उपस्थिती दुगु खः ।