लिड्सं लिभरपुललिसे ज्वलिंज्वः म्हितल
लहनान्यूज | चौलाथ्व अष्टमी, ११४१, वैशाख ७ मंगलबाः
इंग्लीश प्रिमियर लिग फुटबलय् साविक त्याकामि लिभरपुलं लिड्स युनाईटेडलिसे १–१ गोलया ज्वलिंज्वः म्हितूगु दु ।
लिड्स युनाईटेडया ख्यलय् वंगु चान्हय् जूगु कासाय् ३१गूगु मिनेटय् सादियो मानें गोल यासें लिभरपुलयात अग्रता ब्यूगु खः । ८७गूगु मिनेटय् लिड्सया डिएगो लोरेन्तें १ गोल लित बी धुंकाः कासा ज्वलिंज्वलय् क्वचाःगु खः ।
थ्व ज्वलिंज्वःलिसें लिभरपुलं प्रिमियर लिगया ल्याः धलखय् प्यंगूगु थासय् थहांवनेगु ह्वःताः तंकूगु दु । खुगूगु थाय्या लिभरपुलया ५३ ल्याः जूगु दुसा प्यंगूगु थाय्या वेष्ट ह्याम युनाईटेडया ५५ ल्याः दु ।
७४ ल्याःलिसें म्यान्चेस्टर सिटी शिर्ष थासय् दु । उखे प्रिमियर क्लब टोटनह्याम हट्सपरं प्रशिक्षक होजे मौरिन्होयात बर्खास्त याःगु दु ।
न्ह्यानाच्वंगु सिजनय् टोटनह्यामं मनंतुंकथं कासा म्हिते मफय्धुंकाः क्लबं मौरिन्होयात बर्खास्त याःगु खः । सन् २०१९ या नोभेम्बरय् टोटनह्यामया प्रशिक्षण समालेया मौरिन्हो १७ लां हे बर्खास्तीइ लाःगु खः ।
Categorized in कासा
