लुटपाट याःपिं २म्हेसित ज्वन
पोहेलाथ्व चतुर्दशी ११४१, माघ १४ बुधवाः
लुटपाट याःपिं २म्हेसित येँया प्रहरीं ज्वंगु दु । ज्वंपि बझाङ्गया जयपृथ्बी नगरपालिकाका २१दँया सुनिलबहादुर सिंह व सिधुपाल्चोक साङ्गा चोकगढी नगरपालिकाया ३४दँया कृष्णबहादुर श्रेष्ठ खः ।
उपिं निम्ह येँया दरवारमार्गया दोहोरी साँझय् ज्या याइपिं जूगु प्रहरी जानकारी बिल । वंगु माघ १० गते चान्हे १ ताः ईलय् येँया प्रविनकुमार भण्डारीयात प्रहरीं शंकास्पद अवस्थाय् ज्वंगु खः ।
खँल्हाबल्हाया झ्वलय् भण्डारीं मादक पदार्थ सेवन याना लठ्ठ जुयाच्वंगु ईलय् सिंह व श्रेष्ठं वय्कयात लुटपाट याःगु खँ पिहाँवःगु दु । अभियुक्तपिन्सं भण्डारीपाखें लुँया लकेटलिसें, सिखः, अंगु व ब्रासलेट लुटेयाःगु खः ।
प्रहरीं उमिसं लुटे याःगु ज्वलंलिसें लुटपाटय् छ्यःगु छगः मारुती कार नं बरामद याःगु दु । उपिं निम्हेसितं चोरी अपराध अन्तर्गत मुद्दाय् अदालतं म्याद कया दुवालेज्या जुयाच्वंगु प्रहरी न्ह्यनाथदिल ।
