म्यान्चेस्टर सिटी प्रिमियर लिगया शीर्ष थासय्
पोहेलाथ्व चतुर्दशी ११४१, माघ १४ बुधवाः
वेष्ट ब्रोमयात बुकाः म्यान्चेस्टर सिटी इंग्लीश प्रिमियर लिग फुटबलया दकले न्ह्यःनय् थ्यन । वंगु चान्हय् जूगु कासाय् म्यान्चेस्टर सिटीं वेष्ट ब्रोमयात ५–० गोल अन्तरं बुकूगु खः ।
कासाय् सिटीया नितिं इके गुन्डोगानं निगोल याःबलय् होवाँ क्यान्सेलो, रियाद माहारेज व राहिम स्टर्लीङं छगोल छगोल याःगु दु ।
कासा त्याःगुनाप म्यान्चेस्टर सिटीं दकले न्ह्यःनय् दुगु म्यान्चेस्टर युनाईटेडयात ल्यूनय् लाकूगु दु । १९गु कासापाखें म्यान सिटीया ४१गु ल्या दु । युनाईटेडया ४०गु ल्या जुल ।
लिगअन्तर्गत वंगु चान्हय् जूगु मेगु कासाय् आर्सनलं साउथह्याम्पटनयात ३–१ गोल अन्तरं बुकूगु दु । आर्सनलं कासा त्याकूबलय् बकायो साका, निकोलस पेपे व अलेक्जेण्डर लाकाजेटं छगोल छगोल याःगु खः ।
आर्सनल २०गु कासापाखें ३०गु ल्या दयेकाः धलःया च्यागूगु थासय् थहाँवंगु दु । प्रिमियर लिगय् वंगु चान्हय् वेष्ट ह्याम युनाइटेडं क्रिष्टल प्यालेसयात ३–२ गोलं बुकूबलय् लिड्स युनाइटेडं न्युकासल युनानईटेडयात २–१ गोलं बुकूगु दु ।
Categorized in कासा
