म्यान्चेस्टर सिटीं लिभरपुलयात ४–१ गोलं अन्तरं बुकल, उपाधि त्याकेत म्यानसिटीयात ल्याः सन्तोषजनक
पोहेलागा द्धादशी ११४१, माघ २६ सोमवाः
इंग्लीश प्रिमियर लिग फुटबलय् दकले न्ह्यःनय् दुगु म्यान्चेस्टर सिटीं साविक त्याकूमि लिभरपुलयात बुकूगु दु ।
उपाधि त्याकेगु कुतः कथं महत्वपूर्ण धयातःगु थ्व कासा म्यानसिटीं ४–१गोल अन्तरं त्याकूगु दु ।
लिभरपुलया ख्यः एन्फील्डय् जूगु कासाय् पाहाँ पुचः म्यान्चेस्टर सिटीयात त्याकेबीत इके गुन्डोगानं निगोल याःबलय् ग्याब्रियल जिसस व फिल फोडेनं १–१गोल थप याःगु खः ।
बूगु पुचः लिभरपुलया मोहोमद सालाहं पेनाल्टीमार्फत छगोल जक याःगु दु । प्रिमियर लिगया मेगु कासाय् चेल्सीं शेफिल्ड युनाईटेडयात २–१गोलं बुकूगु दु ।
न्हूम्ह प्रशिक्षक थोमस टुकेलया नेतृत्वय् चेल्सीयात मदिक्क निक्वः तक कासा त्याकेबीत मेसन माउन्ट व जर्गीनों १–१गोल याःगु दु ।
प्रिमियर लिगया मेगु कासाय् टोटनह्याम हट्सपरं वेष्ट ब्रोमयात २–० गोलं बुकाः वुल्भरह्याम्पटन वान्डरर्स व लेष्टर सिटीं गोल मयाःसें ज्वलिंज्वः कासा म्हितूगु दु ।
वंगु चान्हय् जूगु कासालिपा प्रिमियर लिगया धलखय् २२गु कासापाखें ५०गु ल्या मुंकाः म्यान्चेस्टर सिटी दकले न्ह्यःनय् थ्यन । छगु कासा उप्वः म्हितूगु म्यान्चेस्टर युनाईटेड, ४५गु ल्यानाप निगूगु थासय् दु ।
अथेहे स्वंगूगु थाय्या लेष्टर सिटीया ४३गु ल्या दु । ४०गु ल्यानाप लिभरपुल प्यंगूगु थासय् दुसा न्यागूगु थासय् दुगु चेल्सीया ३९गु ल्या दु ।
