प्रिमियर लिग फुटबलय् म्यानचेस्टर सिटी व लेष्टर त्यात, लिभरपुलयात ब्राइटनं बुकल
पोहेलागा सप्तमी ११४१, माघ २२ बिहीवाः
इंग्लीश प्रिमियर लिग फुटबलय् वंगु चान्हय् शिर्ष थाय्या म्यान्चेस्टर सिटी त्याबलय् साविक त्याकुमि लिभरपुल बूगु दु ।
मदिक्क १३गूगु कासा त्याकेगु झ्वलय् म्यान्चेस्टर सिटीं बर्न्लेयात २–०या गोल अन्तरं बुकल । सिटी त्यागुलिइ ग्याब्रियल जिसस व राहिम स्टर्लीङं छगू छगू गोल याःगु दु ।
कासा त्यागु नापं म्यान्चेस्टर सिटीं धलःखय् निगूगु थाय्या म्यान्चेस्टर युनाईटेडनाप ३गू ल्याःखं अग्रता काःगु दु ।
२१गू कासां म्यान सिटीया ४७ गू ल्याः जूगु दुसा छगू कासा अप्वः म्हितूगु म्यान्चेस्टर युनाईटेडया ४४गू ल्याः जूगु दु । ३गूगु थाय्या लेष्टर सिटीया ४२गू ल्याः जूगु दु ।
वंगु चान्हय् जूगु कासाय् लेष्टर सिटीं फुल्हमयात २–० गूया गोल अन्तरं बुकल । प्रिमियर लिगय् २२गू कासापाखें ४०गू ल्याः दयेकुगु लिभरपुल ४गूगु थासय् थ्यंगु दु ।
वंगु चान्हय्सिया कासाय् लिभरपुलयात ब्राइटनं १–०गूया गोल अन्तरं बुकल ।
प्रिमियर लिगया हे मेगु कासाय् एभर्टनं लिड्स युनाईटेडयात २–१या गोल अन्तरं बुकुबलय् वेष्ट ह्याम युनाईटेडं एस्टन भिल्लायात ३–१गूया गोल अन्तरं बुकल ।
प्रिमियर लिगय् थौ चान्हय् लण्डन शहरया निम्ह प्रतिद्धन्दी चेल्सी व टोटनह्याम हट्सपर दथुइ धेंधेंबल्ला जुइ ।
