२०८० चैत्र १५, बिहिबार

म्यानमारय् द्वलंद्व जनता सतकय्

पोहेलागा त्रयोदशी ११४१, माघ २७ मंगलवाः

म्यानमारय ब्वज्याः यायेत रोक यासां उकिया उल्ल्लंघन याना द्वलंद्व जनता सतकय् वःगु दु । प्रहरीं ब्वज्यामिपिन्त रवरया गोली तकं कयेगकूगु दु ।
स्वनिगः नाई पाइ तावय् कूको विरोधय् जूगु प्रदर्शनय् प्रहरीं लःया फोहोरा व अश्रुग्याँसं कयेगूगु दु । थ्वः प्रदर्शन आःतक या हे तःधंगु धकाः धाःगु दु ।
वंग्ु वालय् सैनिक कू यायेधुंका निर्वाचित सरकार पूनर्वहाली व आङ साङ सूचीलिसें ज्वनातपिं नेतापिन्त त्वतेमाःगु माग याना निरन्तर प्रर्दशन यानाच्वंगु दु । सेनां सत्ता थःगु ल्हातय् कायेधुंका उपिं नेतापिन्त ज्वंगु खः ।
जनता सतकय् कुहाँवय्धुंका सेनाले तःधंगु जमात भेला जुइत प्रतिबन्ध तःगु दु । ५म्हसिबें अप्वः मनुत सार्वजनिक थासय् जम्मा जुइमदइगु आदेश बिउगु दु । छुं शहरय् धाःसा चान्ह्य् कर्फ्यू तकं लागू याःगु दु । आदेशयात अवज्ञा याना द्वलंद्व जनता प्रदर्शनय् कुहाँवःगु दु । 
थुखे म्यान्मारय् सैन्य कू या विरोधय् तच्वःगु प्रदर्शनया दथुइ सैन्य जनरलं न्हापांगु सम्बोधन याःगु दु । सैन्य प्रमुख मुन अङ लङं न्हापांगु खुसी टेलिभिजनपाखें नागरिकयात सम्बोधन यासें लिपांगु पलाःया आवश्यकताया औचित्य पुष्टि यायेगु कुतः यात ।
वय्कःया सम्बोधन आन्दोलनकारीयात ख्यायेगु स्वयां औचित्य पुष्टिइ हे आपाः केन्द्रीत जूगु खनेदुगु धाःगु दु ।
लिपांगु चुनाव स्वच्छ जुइ मफूगु व निर्वाचन आयोग नं छानविनय् असफल जूगु द्वपं वय्कलं बियादीगु दु । वय्कलं याकनं हे निर्वाचन याकाः सत्ता हस्तान्तरण यायेगु प्रतिवद्धता नं प्वंकूगु दु ।
 वंगु वालय् सेनां निर्वाचित नेतृ आङ सान सू ची लिसेया नेतातय्त ज्वनाः दच्छिया संकटकाल घोषणा यायेधुंकाः म्यानमारय् न्हियान्हिथं हे प्रदर्शनय् ब्वति काइपिनिगु ल्याः अप्वयावनाच्वंगु दु ।
सेनाया उगु पलाःया विरोधय् म्यान्मारय् दशक दुनेया हे तःधंगु प्रदर्शनत जुयाच्वंगु दु ।
Categorized in अन्तर्राष्ट्रिय