म्यानमारया राजदूतं सेनायात सत्तापाखें चिइकेत याःगु इनापयात विश्व समुदायपाखें प्रशंसा, सेनां धाःसा पदं चिइकल
लहनान्युज | सिल्लागा पारु ११४१, फागुन १६ आइतवाः
म्यानमारया सेनां संयुक्त राष्ट्रसंघया निति म्यानमारया राजदूत क्याव मो टुनयात चिइकुगु दु ।
थःगु देय्या सेनायात सत्तां चिइकेत विश्व समुदायनाप ग्वहालिया इनाप यायेधुंका वयेक बर्खास्तगीइ लाःगु खः । राजदुत क्याव मों निर्वाचित सरकारयात सत्ता लित मकातलतेक्क सैन्य शासकनाप सुनांनं सहकार्य मयायेत इनाप यानादीगु खः ।
राष्ट्रसंघया महासभायात सम्बोधन यासें वयेकलं प्रदर्शनकारीयात जूगु दमन अन्त्य यायेत, निर्दोष जनतायात जूगु अत्याचार दिकेत व प्रजातन्त्र पूनर्वहाली यायेत अन्तर्राष्ट्रिय समुदायया सहकार्य मजिमगाः जूगु धयादीगु खः ।
राजदूत क्याव मोया सम्बोधनं सम्मेलनय् प्रशंसा चूलाकुगु खःसा म्यानमारया नितिं अमेरिकी राजदुत लिन्डा थोमस ग्रीनफिल्डं क्याव मोया सम्बोधनयात साहसया छुमां बियादीगु खः ।
थुखे फेब्रअरी १ य् सत्ता लाकाकाःगु म्यानमारया सेनां प्रदर्शनकारीयात दमन न्ह्याकातःगु दु । म्हिगः जक हनोईस जूगु ब्वज्याय् सुरक्षाकमीया गोलीं लाना छम्ह मिसा घाःपाः जूगु दु ।
सेनाया ख्याच्वःया बाबजुद द्वलंद्वःम्ह जनता ब्वज्याय् कुहाँवया निर्वाचित सरकारया पूनर्वहाली व ज्वनातम्ह नेतृ आङ साङ सूची लिसेंया नेतापिनि रिहाइया माग याःगु दु ।
Categorized in अन्तर्राष्ट्रिय
