न्हूदँया ज्याझ्वः सार्वजनिक
लहनान्युज | कौलागा द्धादशी ११४१, कार्तिक १६ मंगलवाः
नेपाल संवत न्हूदँ राष्ट्रिय समारोह समिति ११४२ या ग्वसालय् छगु पत्रकार सम्मेलनयासें न्हूदँया ज्याझ्वः सार्वजनिक याःगु दु।
समारोह समितिया निरञ्जनरत्न शाक्यं न्हूदँ ११४२ या लसताय् येँया बसन्तपुरय् जुइगु भिंतुना ¥याली व ¥याली लिपा जुइगु सभाय् ब्वति कायेत सकलसित इनाप यानादीगु खः। समितिया अध्यक्ष शाक्यं पत्रकार सम्मेलनय् न्हूदँया लसताय् थीथी ज्याझ्वः यायेगु जानकारी बियादीगु खः।
वयकलं थुगु दँनिसें शंखधर दिवस येँया लखुतीर्थया लिसेलिसें शंखधर पार्कय् नं यायेगु खँ न्ह्यथनादीसे, नेपाल संवतया नितिं आर्थिक कोषया व्यवस्था यायेगु व नेपाल संवतयात कयाः प्रशिक्षण ज्याझ्वः न्ह्याकेगु खँ नं न्ह्यथनादीगु खः। समारोह समितिया संचार उपसमितिया ग्वसालय् जूगु उगु पत्रकार सम्मेलनय् ज्याझ्वः नृपेन्द्रलाल श्रेष्ठं न्ह्याकादीगु खःसा सुभाय् सुजीव बज्राचार्यं देछानादीगु खः ।
(पुवंक ब्वनादिसँ पत्रकार सम्मेलनय् सार्वजनिक याःगु प्रेस विज्ञप्ति)
नेपाल संवत् न्हूदँ राष्ट्रिय समारोह समिति ११४२ या प्रेस वक्तव्य
हनेबहःपिं सञ्चारकःमि भाजु ÷ मयजुपिं,
नेपाःया राष्ट्रिय विभूति शंखधर साख्वालं देय्या नामं नीस्वंगु नेपाल संवत ११४२ न्हूदँया लसताय् दकलय् न्हापां सकसितं भिंतुना देछाना । नेपाः देय्या नामं नीस्वनातःगु नेपाल संवतया ऐतिहासिक महत्व नेपाःया निंतिं छगू तःधंगु म्हसीका नेपाल संवत खः । दँय्दसं नेपाल संवत न्हूदँया लसताय् भिन्तुना सभा व भिन्तुना ¥याली ग्वसाः ग्वयाः वयाच्वनागुलिं वंगु दँय् कोरोना महामारीया हुनिं राज्य याःगु लकडाउनया कारणं भर्चुअल माध्यमं भिन्तुना सभालिसें बिचा गोष्ठी व साँस्कृतिक ज्याझ्वः ग्वसाः ग्वयागु छिकपिन्सं लुमं हे जुइ । थुगुसिइ कोरोना महामारीया सक्रमण छुं भचा क्वलानाः वंगुलिं थुगुसी स्वास्थ्य सुरक्षाया मापदण्ड पूर्णरुपं पालना यानाः नेपाल संवतया न्हूदँ तःजिक हनेगु निंतिं नेपाल संवत न्हूदँ राष्ट्रिय समारोह समिति ११४२ निरञ्जनरत्न शाक्यया नेतृत्वय् नीस्वनेज्या जुइधुंकूगु दु । लिसें न्हूदँ तःजिक हनेगु निंतिं ८० म्ह दुजः दुगु समारोह समिति गठन यानाः १५ सदस्यीय सचिवालय समिति नीस्वनेगु ज्या जूगु दु ।
वंगु कौलाथ्व पारु (कार्तिक १ गते) नेपाल संवत न्हूदँ राष्ट्रिय समारोह समिति ११४० व ११४१ या नायः भाजु रमेश महर्जनजु मत्यवं मदुगुलिं थुगु समारोह समितिं दुःख प्वंकाच्वना । वय्कः मदुगुलिं नेपाल संवत आन्दोलनं छम्ह सक्षम नेता मदयेका च्वनेमाःगु खँ छिकपिंनाप खँ ब्याकाच्वना । कोरोना महामारीया हुनिं वय्कलं नेपाल संवतयात कयाः जनस्तरय् चेतना ब्वलंकेगु व नेपाल संवतयात राज्यपाखें व्यवहारय् छ्यलाबुला याकेत दबाब बिइकथं दयेकादीगु थीथी योजनात पूमवंगुयात पूवंका वनेगु प्रतिबद्धता नं प्वकाच्वना ।
थुगुुसी थ्वहे वइगु ११४२ कछलाथ्वः पारु (कार्तिक १९ गते) शुक्रवाः बसन्तपुरं न्ह्याइगु भिंतुना ¥याली व्यवस्थित रुपं न्ह्याकेगु निंतिं व माःकथंया तयारीया निंतिं व्यवस्थापन समिति, आर्थिक समिति, सञ्चार समिति, सांस्कृतिक समिति, ¥याली व्यवस्थापन समिति, नेपाल संवत न्हिल्याः पौ समिति, प्रतिनिधि मण्डल समिति, न्हूदँ लुमन्तिपौ समिति, मिसा समिति, देसय् दुने व पिने जुइगु न्हूदँ ज्याझ्वःया गतिविधि मुना समिति, माइक मञ्च व्यवस्थापन समिति, स्वय्मसेवक समिति, जातिय खलः पुचः व संघसंस्था समन्वय समिति, सिनामंगलय् शंखधर ज्याझ्वः समिति नीस्वनेगु ज्या जुइधुंकूगु दुसा थुगु समितितपाखें थीथी ज्याझ्वः न्ह्याके धुंकूगु दु ।
अथेहे प्रतिनिधि मण्डलयापाखें हनेबहःम्ह प्रधानमन्त्री शेरबहादुर देउवायात नाप लानाः बसन्तपुरय् जुइगु न्हूदँया भिंतुना ¥याली व सभाय् मूपाहाँकथं ब्वति कायेगु निंतिं ब्वना पौ लःल्हाये धुनागु दु । लिसें समितियात आर्थिक ग्वाहालिया निंतिं इनाप व नेपाल संवतयात कयाः सरकारयात ध्यानाकर्षण याकेमाःगु खँयात कयाः ध्यानाकर्षण पौ लःल्हाये धुनागु दु । उगु ध्यानाकर्षण याकागु पौया मू मागत छिकपिनिगु न्ह्यःने सार्वजनिक यानाः प्रचारप्रसार यानादी धइगु भलसा कासें क्वय् न्ह्यथना कथं जूगु जानकारी बियाच्वना ।
१) नेपाल संवतयात राष्ट्रिय संवत घोषणा याःथें सम्मान नं यायेमाल ।
२) नेपाल संवतयात व्यवहारय् छ्यलाबुलाय् हयेमाल ।
३) नेपाल संवतयात राष्ट्रप्रमुख व सरकारी निकायया छ्यलाबुलाय् वइगु लिखित दस्तावेजय् छ्यलेमाल ।
४) नेपाली मुद्रा व नोटय् नेपाल संवत छ्यलेमाल ।
५) नेपाल संवत प्रतिष्ठान पलिस्था यायेमाल ।
६) नेपाल संवतया प्रवर्तक संखधर साख्वाः व नेपाल संवत सम्बन्धी खँ विद्यालय व क्याम्पसस्तरया दक्व तहया पाठ्यक्रमय् दुथ्याकेमाल ।
७) नेपाल संवत राष्ट्रिय रुपं हनेत राज्यपाखें आर्थिक कोषया व्यवस्था यायेमाल ।
८) राष्ट्रिय विभूति शंखधर साख्वाःनाप स्वापू दुगु व दयेफुगु पुरातात्विक व ऐतिहासिक थाय् व परिसरया राज्यं संंरक्षण यायेमाल ।
प्रधानमन्त्री देउवां उगु मागयात कयाः सकारात्मक लिसः बियादीगु दु ।
नेपाल संवत न्हूदँया लसताय् थुगुसी नं थीथी ज्याझ्वःत स्वःस्फूर्त थीथी संघसंस्था, राजनीतिक पार्टीतय्सं तुच्चा ज्याझ्वः यानाः वयाच्वंगु दु । नेपाल संवतया महत्व व थुकिया गरिमायात सकल नेपाःमि राजनीतिक पार्टीया नेतातय्सं थुइधुंकूगु खःसां नेपाल संवत राष्ट्रिय संवतया घोषणालिपा थ्व संवतयात स–सम्मान राज्यं थाय् धाःसा अझ हे ब्यूगु मदुनि ।
नेपाल संवत राष्ट्रिय संवत खः धायेधुंकाः थ्व संवतयात व्यवहारय् छ्यलेमाः धइगु माग झी सकसिनं यानाच्वनागु दु । नेपाःया संवत नेपाल संवत मौलिक संवत खः, ने.सं. ११२९ य् थ्व संवतयात राष्ट्रिय संवत धकाः घोषणा यायेधुंकाः थुकियात व्यवहारय् आःतक नं मछ्यःगु हुनिं थ्व दँय् ‘नेपाःया म्हसीका, नेपाःया गौरव, राज्यं हे छ्यलेमाः, नेपाल संवत’ धइगु नारा बियागु दु । लिसें राष्ट्रिय जनगणना २०७८ य् झी सकले सचेत व सजग जुयाः झीगु जाति, भाषा व धर्मया विवरण च्वकेत नं इनाप यानागु दु । नेपाल संवत राष्ट्रिय संवत जूगुलि थ्व संवतयात मतिना याइपिं थ्व संवतयात नेपाः देय्या संवत कथं छ्यलेमाः धकाः माग याइपिं सकल जनता धात्थें राष्ट्रवादी व राष्ट्रिय भावनां बिलिबिलि जाःपिं नेपाःमित खः धइगु भावना जनस्तरय् तक अझ अप्वः थ्यंकेगु कुतः झीसं यायेमाःगु दु ।
नेपाल संवतया महत्व व थुकिया विविध पक्षयात कयाः न्हूदँ छन्हु जक मखु, न्हूदँ लिपा नं निरन्तर थीथी ज्याझ्वःत तयाः प्रचारात्मक अभियान न्ह्याकेमाःगु दु । थ्वहे हुनिं न्हूदँ समारोह समितिं न्हूदँ लिपा नं थीथी कथंया ज्याझ्वः यायेगु निंतिं सहलह जुयाच्वंगु खँ छिकपिन्त कनाच्वना ।
नेपाल संवतया प्रवर्तक शंखधर साख्वाःयात राष्ट्रिय विभूति घोषणा याःगु न्हिया लुमन्ति दँय्दसं कछलाथ्व दसमीकुन्हु शंखधर दिवस हनाः वयाच्वनागु थुगु दँय् न सुथय् लखुतिर्थय सभा यानाः व सनिलय् शंखधर पार्कय दिपावली यायेगु ज्याझ्वः तयातयागु जुल । थुगु दँय् बागमती प्रदेशलिसें न्हयगु हे प्रदेशया सरकारयात नेपाल संवतयात व्यवहारय् छ्यलाबुला हयेगु लिसें थीथी माग नापं ध्यानाकर्षण पौ लःल्हायेगु जुइ । नेपाल संवतया थीथी पक्ष जनजनय् थ्यंकेत थीथी लागाय् प्रशिक्षण न्ह्याकेगु लिसें नेपाल संवत आन्दोलनय् योगदान यानादीपिन्त हनेगु ज्याझ्वः ग्वसाः ग्वयाच्वनागु खँ कनाच्वना । देय्न्यंक न्हूदँ हनाः वयाच्वंगु थीथी समारोह समितिया दथुइ सहलह व्याकाः एकरुपताय् हयेगु ग्वसाः दुगु खँ कनाच्वना । नेपाल संवत न्हूदँ राष्ट्रिय समारोह समिति संस्थागत यायेगु लिसें नेपाल संवत अक्षय कोष नीस्वनेगु ज्या थुगु दँय् न्ह्याकेगु जुइ । दँय्दसंथें थुगुसिइ नं भिंतुना साँस्कृतिक सनिल, सपूm ब्वज्या व नसात्वसा ब्वज्याया ग्वसाः दुगु कनाच्वना । अथेहे जनकवि दुर्गालाल श्रेष्ठया च्वसां पिदंगु नेपाल संवत न्हूदँया म्येया कासा यानाः न्हूपिं कलाकारपिन्त हपा बियाः वनेगु ग्वसाः दुगु खँ कनाच्वना । नेपाल संवत १ निसें थौंतकया न्हिल्यापौ पिथनेगु ग्वसा दुगु खँ कनाच्वना । थ्व बाहेक नं न्हूदँ समारोह समितिया थीथी कवलं थुगु दँय् थीथी ज्याझ्वः यायेगु ग्वसाः ग्वयाच्वंगु खँ नं छिकपिन्त कनाच्वना ।
तःदँ न्ह्यःनिसें न्हूदँ नेपाल संवतया मान्यता बीकेगु निंतिं जुयाः वयाच्वंगु आन्दोलनकथं झी सकसियां ब्वति कयाः वयाच्वनागु खः । थ्व संवतयात राष्ट्रिय संवत घोषणा यायेधुंकाः झीगु आन्दोलनया रुप जक हिउगु खः, आन्दोलन धाःसा न्ह्याना हे च्वंगु दनि धइगु भावना सकल नेपाःमितय्त बीमाःगु दनि । राष्ट्रिय संवत धकाः घोषणा यानाः जक मगाः, थ्व संवतयात राष्ट्रं सम्मान यायेमाः व नेपाःया संवत राष्ट्रिय संवत नेपाल संवत जूगुलिं थुकियात व्यवहारय् छ्यलाः झी धात्थें राष्ट्रिय भावनां बिलिबिलि जाःपिं नेपाःमित खः धइगु खँयात हलिमय् ब्वये फयेमाः नेपाःया संवत राष्ट्रिय संवत नेपाल संवत खः थ्व संवतयात झी सकस्यां अझ अप्वः मतिना याये फयेमाः । थ्वहे सन्देश न्हूदँ ११४२ या लसताय् जनजनयात थ्यंकेगु झीगु आज्जु खः । हानं छक्वः न्हूदँया लसताय् भिंतुना ।
निरञ्जनरत्न शाक्य
नायः
नेपाल संबत् न्हूदँ राष्ट्रिय समारोह समिति ११४१
ने.सं ११४१ कौलागा एकादसी
सकसित प्रचार प्रसार यानादीत इनाप यानाः – नेपाल संबत राट्रिय न्हूदँ समारोह समिति ११४२
Categorized in राष्ट्रिय
