शेयर बजाःया परिसूचक नेप्से थौं बुधवाः न थहावंगु दु। नेप्से थौं १६ दशमलव ९५ अङ्क थहावना २ हजार ८०१ दशमलव ५२ विन्दुइ थ्यंगु दु।

बैंक, व्यापार, होटल, जलविद्युत्, फाइनान्स, माइक्रोफाइनान्स व मेमेगु समूहया शेयर न थहावंगु दु। विकास बैंक, बीमा, उत्पादन, लगानी व म्युचल फन्ड समूहया शेयर धासा कुहावंगु दु। २ सय २४ कम्पनीया १ करोड १९ लाख कित्ता शेयर ७ अर्ब ३७ करोड रुपैयाँया कारोबार जुगु दु।

दकलय् अप्वो नेपाल टेलिकमया ५८ करोड ६८ लाख रुपैयाँया शेयर किनबेच जुगु दु। थौं पञ्चकन्यामाई हाइड्रो, अपर तामाकोशी जलविद्युत्, मानुषी लघुवित्त व तेह्रथुम पावर कम्पनीया शेयर १० प्रतिशतं थहावंगु दु।

समग्र बजाः थहावंसा बोटलर्स नेपाल व महालक्ष्मी विकास बैंकया शेयर झन्डै साढे ७ प्रतिशतं घटे जुगु दु।

Categorized in राष्ट्रिय