२०८० चैत्र १५, बिहिबार

रामदेव प्रकरण – ‘छु फ्वन व बी’

डा. रोशन श्रेष्ठ | कछलागा अष्टमी ११४२, मंसीर ११ सनिवाः

वय्कःयात नेपालय् छु माः व बीगु बचं प्रधानमन्त्रीं बीधुंकाः छिगु नुगलय् छु खं धौबजि वाय्काच्वंगु दु । वं छु माः धकाः फ्वनी ? प्रधानमन्त्रीं छु बी धाल जुइ ?
 
जग्गा माल – बियाब्यु, छेँ माल – बियाब्यु, कार माल – बियाब्यु, आइफोन माल – बियाब्यु ।
 
छु रामदेव थज्याःगु खँ फ्वनीम्ह मनू खः लाः ले ? थज्याःगु खँ जक फ्वनेत नेपाल वःगु खइला ? जितः ला खँ थें मच्वं का न्हि । थज्याःगु खँत रामदेवं छाय् फ्वं वइ ? बिचाः याय्, वय्कलं थुकथं फ्वन हं, – ‘जितः नेपालया नागरीकता माल’ – छु प्रधानमन्त्रीं
नागरीकता बीत तयार जुइला ? अथवा, पलखयात बिचाः याय्, बी धाल हं, छिं छु यानादी ?
 
थौं थुकथं नेपालया प्रधानमन्त्रीयात ‘छु माः व बी’ धकाः नवाय्गु हैसियतय् थ्यंकीगु अवस्थाबारे चलखेल शुरु जूगुबारे स्वला न्ह्यः हे जिं फेसबुकय् छुं पोस्ट यानागु खः । व पोस्ट गुलिसित लुमं नं जुइफु, गुलिसितं ल्वःमन जुइ । व पोस्ट आः नं जिगु वालय् ल्यं दनि । 
 
थौं ‘सितिकं जग्गा बी’, धकाः प्रचार यात, कन्हय् बिरोध तच्वइ, ‘सितिकं मखु, धेबा पुलाः न्याय्गु खः’ धयाबी । वयाके धेबा मदुगु ला पक्कां मखु । धेबा पुला हे न्याइ, डबल भावय् न्याइ, अले सकलें तैं चुप मै चुपया अवस्था जुइ । छाय्कि, पतञ्जलीं नेपालय् जग्गा माल धकाः थौं जक धाःगु मखु । थनिं च्यादँ–झिदँ न्ह्यःनिसें हे धयावःगु खः, तर जग्गा काय् मफयाः मकाःगु धाःसा मखु । अन्तर्राष्ट्रीय सेटिङ तालय् मलानाच्वंगु खः, अले अनेक त्वलहय् लिबानाच्वंगु, लिबाकाच्वंगु जक खः ... हा हा ।
 
रामदेव चानचुने मनू मखु । वय्कल् भारतय् नरेन्द्र मोदी–योगी आदित्यनाथ स्वयां शक्तिशाली मनू जुइधुंकल । रामदेवं गुगु दिनय् समर्थनं ल्हाः लिकाइ, नमो–योगीतय् राजनीति सिधयावनी । भारतीय राजनीतिया सँगू सँगू थूपिं मनूतय्सं थ्व खँ बांलाक हे थूगु जुइमा ।
 
आचार्य बालकृष्ण सु खः ? वय्कः रामदेवया कानूनी ख्वाःपाः खः । बुँख्याःचा थें च्वंम्ह नारद खः । कानूनी व आर्थिक हैसियत दुवालेगु खःसा रामदेवया अस्तित्व गनं मदु । बिलियन डलर स्वयां तःधंगु अर्थ साम्राज्य कय्च्यानाच्वंगु पतञ्जली उद्योग संरचनाय् रामदेवया स्वामित्वय् छपु सिसाकलम नं मदु । कानूनतः आर्थिक हैसियतयात दुवालेगु खःसा डोनाल्ड ट्रम्प स्वयां झिदुगं तःमि जुइ आचार्य बालकृष्ण । अले रामदेव चाहिं, छि, जि, झी स्वयां नं गरीब । तर थुपिं निम्ह गुकथं ब्वहलिसे ब्वह ल्वाकाः जुइ फयाच्वंगु दु– उकिया ज्वः मदु । तर उपिं निम्हं सार्वजनिक थासय् हतपत्त नापं जुइमखु ।
 
अज्याःम्ह रामदेव थुज्वःम्ह मनू, थः बालकृष्णयात नापं ब्वनाः प्रचण्डया जहान सीताया स्वास्थ्य स्थीति सीकेत वय्कःया कोथाय् थ्यने सम्भव दु ला ? सामान्य अवस्थाय् ‘सम्भव मदु’, तर यदि सम्भव जुल धाःसा व चानचुने घटना मखु । अय्जुयाः थ्व भयंकर
तःधंगु घटना खः । प्रचण्डया अमेरिका भ्रमण स्वयां तःधंगु घटना खः थ्व ।
 
देउवां छु नवात, व देउवाया थःगु हे धापू मखु । वय्कःया मुखारविन्दुं ‘गोपी कृष्ण कहो’ नवाकेब्यूगु प्रचण्ड एण्ड कम्पनीं खः । प्रचण्डं ला धाःगु हे नं दु नि, “जि प्रधानमन्त्री मजुयां छु जुल, सरकार जिगु हे तजबीजय् न्ह्याइ ।’ निमित्त नायक जूम्ह देउवां थुकी “नाच भालु नाच, बारुले कम्मर भाँच“ धाय्धुंकाः प्याखं हुलाः क्यने हे माल, छु याय्गु ? अले याद यानादिसँ, थज्याःगु धापूबारे न ओली, न नेपाल, न खनाल, न पौडेल, न भट्टराइ, न यादव, न ठाकूर – सुनां नं टिप्पणी वा बिरोध याइमखु । ‘सर्पं हे सर्पया तुति खनी नि ।’
 
आः खँ स्पष्ट हे दु, प्रचण्ड एण्ड कम्पनीया हे ब्वनाय् रामदेव–बालकृष्ण नेपाल वःगु खः । तर छाय् ? व तःधंगु रहस्य खः । फ्रीमेशनीया विश्वासपात्र खः रामदेव । सुया लगानीइ पतञ्जलीया व्यवसाय विस्फोटक प्रगती जूगु खः । प्रचण्डं रामदेवयात ‘बैज्ञानिक व क्रान्तिकारी’ धकाः तारीफ यात, तर बालकृष्णबारे छुं हे नमवाः । जब कि थुपिं निम्हमध्ये आयूर्वेद बांलाक ब्वनातःम्ह व दख्खल दुम्ह ‘वैज्ञानिक’ वास्तवय् बालकृष्णयात धाय्फइ । रामदेव–बालकृष्णया मित्रता गुकथं दुग्यन ? शुरुवाती दिनय् रामदेवं मेपिन्त त्वःताः बालकृष्णयात पार्टनर दय्कूगु छाय् खः ? छाय् कि बालकृष्ण च्यवनप्राश दय्केत पोख्तम्ह खः व वं थःके ‘संजीवनी बुटी’ बारे हिमाली ज्ञान दु धइगु विश्वास रामदेवयात ब्यूगु खः । औषधी विज्ञानया विषयस यूनिभर्सिटी व रिसर्च सेन्टरतलिसे अन्तरक्रिया याय्माःसा न्ह्याथासं बालकृष्ण हे थ्यनी । तर प्रचण्डं वय्कःयात मखसें रामदेवयात वैज्ञानिक धकाः ल्ह्वनाबिल – छु थ्व काकताली खः ला ? 
 
छगू स्यल्लाःगु फ्रीमेशनी अखडा नेपालय् दइबलय् व मार्फत नेपालया पिपलपातेतय्त फ्रीमेशनी–नत्थी तय् अःपुइगु छगू धुकुमाः याय्फइ । गुकिया लागिं रामदेव दुहांवय्त लँ म्हुयाच्वंगु दु । 
 
मेगु कारण, भारतय् फ्रीमेशनीतय्विरुद्ध तच्वःगु जनचेतना अप्वया वनाच्वंगु दु । यदि व क्रम अप्वया वनेगु खःसा उकिं छगू सशक्त अभियानया रुप काइ व थ्व विश्वया मुक्ति अभियानया नेतृत्व भारतं जुइगु संभावना दु । तर व अभियान शान्तिपूर्ण जुइमखु, रक्तपात गुगु रुपं जुइगु खः, वव भविष्यया गर्भय् हे दनि । उगु इल्य् भारतीय राजनीतिइ फ्रीमेशनी–नत्थी तय्त भारत लिक्क, तर भारतं पिने सुरक्षित अखडा माली । अय्जूगुलिं धाय्फइ, अफगानिस्तानया स्थीति हिलेधुंकाः ह्यूगु सेटिङया हुनिं आः नेपालय् अखडा जमे मयासे मगाःगु स्थीति दु । भू–राजनीतिइ नेपालया महत्व अप्वयावंगु अवस्था ला छिं स्यूगु हे खत । बिदेशी हाइप्रोफाइल दूततय् तारन्ताःया भ्रमण वाच यानादिसँ, छिं थुइका हे काइ । 
 
आः, पतञ्जलीया नामय् दय्कीगु भवन व संरचनात बिएसएल–४ थुज्वःगु सैन्य सुरक्षा व आधुनिक प्रविधियुक्त जुइ, सैनिक हेडक्वार्टर थुज्वःगु जुइतिनि । अज्याःगु ज्या ताःलाकेत नेपालय् प्रचण्ड–ओली थुज्वःपिं मनूतय्त राजनीतिइ शक्तिशाली दय्कातय् आवश्यक जुइ । फ्रीमेशनी कव्जाय् दुगु अमेरिकि संस्थापनं थुगु मामिलाय् ग्रीन सिग्नल बी धुंकूगु जुइमाः व थज्याःगु ज्याखँय् याकनं याकनं प्रगति जुयावनी । सर्वसाधारण जनतां थुकथंया सेटिङ व कारोबारयात गुगु नजरं ग्रहण याइगु खः, व चाहिँ वइगु दिनय् सी दयावनी ।
 
खँ थुइके, मुसुमुसु न्हिले।