२०७८ माघ ५, बुधबार

संकिपा क्यना ग्याँस मुयाःपिडतपिन्त ग्वाहालियात

लहनान्युज | थिंला पंचमी ११४२, मंसीर २२ बुधवाः

यलया नःबहालय् ग्याँस मुयाः छखा हे छेँया प्यम्ह सीउगु घटनाय् लाःपिं छेँजःपिनिगु आर्थिक ग्वाहालिया नितिं किपूया धुँदेय् प्रोडक्सनपाखें दयेकूगु नेपालभाषाया सामाजिक संकिपा ‘बसन्त ऋतु’ गुण सिनेमा हलय् निगू शो क्यनाः ग्वाहालि रकम मुंकेगु ज्या याःगु दु।

उगु संकिपा क्यनेज्या लिपा ग्याँस मुयाः जूगु घटनाय् लाःम्ह मयजु अनार ताम्राकारयात सकल स्वकुमिपिनिगु न्ह्यःने लःल्हाःगु खः। बसन्त ऋतु संकिपा क्यनाः १,५५,५०० तका दां मुंगु खःसा उगु दां यल ज्ञानमाला संघया नायः डबल शाक्यं पीडित यात लःल्हागु खः। वहे ज्याझ्वलय् बसन्त ऋतु संकिपाया छम्ह कलाकार किपूया राम महर्जनं न्याद्वः तका दां पीडित अनार ताम्राकारयात लःल्हानादीगु खः।

ज्याझ्वलय् यल ज्ञानमाला संघया निर्माणय् याकनं हे बुद्धकालीन कथाबस्तुइ आधारित संकिपा दयेकेगु घोषणा नं याःगु खः। संकिपाया लेखन निर्देशनया भाला बसन्त ऋतु संकिपाया निर्देशक बरिष्ठ निर्देशक पवन जोशीयात बिइगु स्वकुमिपिनिगु न्ह्यःने प्रतिबद्धता प्वंकूगु दु।

ज्याझ्वलय् बसन्त ऋतु संकिपाया कलाकार, प्राविधिक व लेखक निर्देशक पवन जोशीयात यल ज्ञानमाला संघपाखें संघया नायः शाक्यं सम्मान यानादीगु खःसा किपूया धुँदेय् प्रोडक्सनपाखें नं यल ज्ञानमाला संघया नायः शाक्ययात सुभाय् पौ संकिपा निर्देशक जोशीं लःल्हानादीगु खः।

Categorized in मनोरन्जन