एमसीसीयात कयाः बाबुरामं पार्टी टुक्रा याय्त स्वःगु द्वपं
लहनान्युज | पोहेलागा द्धादशी ११४२, माघ १५ सनिवाः
जनता समाजवादी पार्टी दुने महन्थ ठाकुर पुचः बायावंगु खुलाया दुने हाकनं थन न्हूगु बाय्भू खनेदुगु दु । जसपा पार्टी दुने इलय्ब्यलय् विवादित जुयावःम्ह नेता बाबुराम भट्टराईं पार्टीयात ब्वथलेत स्वःगु खँ पिहांवयाच्वंगु दु । थीथी त्वहः पिकानाः बाबुरामं पार्टीयात टुक्रे याय्त स्वःगु खँ पार्टी पिनं जक मखु, पार्टी दुनं हे पिहां वयाच्वंगु दु ।
जनता समाजवादी पार्टी दुने निम्ह कार्यकारी अध्यक्ष च्वनीगु व्यवस्था दु । तर महन्थ ठाकुर पक्ष जनता समाजवादी पार्टीं बायाः लोकतान्त्रिक समाजवादी पार्टी (लोसपा) गठन याःवनेधुंकाः छम्ह अध्यक्षया थाय् खाली जुयाच्वंगु दु । थ्व अवस्थाय् नेता बाबुराम भट्टराई पक्षधरं व खालीगु कार्यकारी अध्यक्षय् थः नेता बाबुरामयात तय्माःगु माग तयाहःगु दु । माग थुलिइ जक सिमित मजुल । बाबुराम भट्टराईयात कार्यकारी अध्यक्ष दय्काः अशोक राईयात संघीय परिषद् अध्यक्ष दय्केमाःगु माग उमिसं तयाच्वंगु दु । उलि जक नं मखसें, बाबुराम पक्षं दक्वं कार्यकारी अधिकार उपेन्द्र यादवं थःके तःगु धासें नं इलय्ब्यलय् विरोधया सः थ्वय्कावःगु दु । थज्याःगु कथंया अवस्थाय् जसपा दुने निगू पक्ष दथुइ विवादं उग्र रुप कयाहःगु दु ।
थौंया जसपा धाय् अथवा तत्कालीन संघीय समाजवादी फोरम व नयाँ शक्तिया एकिकरण धुंकाःया समाजवादी पार्टीइ हे धाय्, इलय्ब्यलय् निगू पक्ष दथुइया विवाद बजारय् छताछुल्ल जुयाच्वंगु दु । येँय् स्थानीय ल्याय्म्हत जानाः लकडाउनया इलय् फुटपाथ हटाउ अभियान न्ह्याकूबलय् नं बाबुरामं फुटपाथ पसल्याया पक्षय् अभिव्यक्ति ब्यूबलय् संघीय समाजवादी पक्षं बाबुरामया अभिव्यक्तिया विरोध याःगु खः । लिसें रुपा सुनार काण्डय् नं बाबुरामं सुनारया पक्षय् न्ववाःबलय् नं उकथं हे निगू पक्ष दथुइ विवाद जूगु खः । बाबुरामं सामाजिक संजालमार्फत न्ह्यागु नं विषययात कयाः प्रतिक्रिया बियाच्वनेगु यानाच्वंगु दुसा व हे प्रतिक्रियाया हुनिं पार्टी दुने विवाद नं जुयाच्वनेगु याः । बाबुरामया हरेक विषयवस्तुइ तत्काल प्रतिक्रिया बियाच्वनेगु थ्व पहःयात कयाः समाजवादी पक्ष जक मखु, गुलिखे नयाँ शक्ति पक्षयापिं नेता, कार्यकर्ता तकं असन्तुष्ट जुयाच्वंगु खँ नं न्यनेदु ।
थज्याःगु दक्वं खँ जुयाच्वंबलय् आः धाःसा न्हूगु व थारान्हुइका बीगु खँ पिहांवःगु दु । अप्वः धइथें नेपालीत अमेरीकि परियोजना मिलिनियम च्यालेन्ज कर्पोरेशन (एमसीसी) या विरोधय् दनाच्वंगु दु । विशेष यानाः नेपाली कांग्रेस पार्टी ला एमसीसीया समर्थनय् हे दुसा मेमेगु पार्टीइ गुलिसिनं विरोध यानाच्वंगु दुसा गुलिसिनं समर्थन यानाच्वंगु अवस्था दु । जसपा पार्टी दुने धाःसा मिश्रित कथंया सः ताय्दयाच्वंगु दु ।
अशोक राई, राजेन्द्र श्रेष्ठलगायतया नेतातय्सं शुरुंनिसें हे एमसीसीयात कयाः विरोध हे क्यनावःगु दु । यथास्थितीइ एमसीसी पास याय् मज्यूगु सः वय्कःपिन्सं तयावःगु दु । उकिया नापं नेकपा माओवादी (केन्द्र) या अध्यक्ष पुष्पकमल दाहाल प्रचण्डं नं थ्व हे खँ न्ववानावःगु दु । बाबुराम धाःसा एमसीसी पास याकेमाःगु पक्षय् खनेदु । एमसीसीया विरोध यानाच्वनेमज्यूगु अभिव्यक्ति बाबुरामं सार्वजनिक रुपं बियावःगु दु । जसपा पार्टी दुने पुर्व संघीय समाजवादी फोरम पक्षं एमसीसीयात पंग थनाच्वंबलय् एमसीसी पास याकेत हे बाबुरामं पार्टी विभाजन याय्त स्वयाच्वंगु खँ आः पिहांवःगु दु ।
थ्वयां न्ह्यः नं, जसपा पार्टी दुने नयाँ शक्ति पुचःया छगू जुम मिटिङय् थःपिं पार्टी कब्जा याय्गु योजनाय् यक्व न्ह्यःने थ्यनेधुंकूगु धकाः न्ववाःगु धासें बाबुरामया तच्वःगु विरोध जूगु खः । थुकथं गुलि नं खँय् विरोधया सः दन, गुलि नं खँय् विवाद जुल, व पार्टीयात ब्वथलाः थःगु ल्हातय् काय्गु छगू नियोजित षडयन्त्र हे खःगु खँ पिहांवयाच्वंगु दु । पार्टी विभाजन यानाः एमसीसी पक्षधरत जक छथाय् मुनाः याउँक एमसीसी पास याकेगु योजनाय् बाबुराम दुगु खँ पार्टीया दुनेया स्रोतं हे दावी याःगु दु । तर आः जसपा दुने गुलि नं विवाद खनेदयाच्वंगु दु, व विवाद मखसें, वहस जक खःगु व पार्टी दुने थज्याःगु वहस स्वाभाविक खँ खःगु धासें पार्टीया नेतातय्सं धाःसा खँ त्वपुइत स्वयाच्वंगु दु । आः पार्टी दुनेया थ्व विवाद वहस जक खःकि आः ताय्दुगु कथं पार्टी विभाजनया षडयन्त्र हे खः, व भविष्यं कनीगु खँ जुल।
