सद्भावपूर्ण प्रतिस्पधापाखे देश—देशया दथुइ सम्बन्ध मजबुत जुइफु धका येँ महानगरया मेयर बिद्यासुन्दर शाक्यं धयादीगु दु।

युवापिनिगु बिकास जुइगु कासायात महानगरं प्राथमिकता बियावयाच्वनागु दु। म्हिगः शंखपार्क नाप स्वागु  पाकिस्तान एम्बेसी ग्राउण्डय् टि—ट्वान्टी क्रिकेट कासाया उलेज्या यानादीसे मेयर शाक्यं कासापाखे स्वच्छ सहर निर्माणय् महानगरं लगानी याना वयाच्वनागु दु धका धयादीगु खः।

‘महानगरं फुटबल, क्रिकेट लगायतया कासाय् प्रत्यक्ष ग्वाहालि याना वयाच्वनागु दु।’ मेयर शाक्यं धयादीगु दु, ‘नेपालय् क्रिकेटया बिकास व विस्तार सन्तोषजनक दु। गुकिइ राष्ट्रिय गौरव थकायेत ग्वाहालि जुइ। युवा शक्तिपिन्त सकारात्मक ज्यायायेत प्रेरणा बिइगु धइगु हे कासा खः।’ नेपाःया लागि पाकिस्तान दूताबासं ग्वसाः ग्वंगु न्ह्यकःगु सस्करणया कासा खः।

उगु ज्याझ्वलय् न्ववानादीसे पाकिस्तानया राजदूत शैयद हाइदर शाहं, कोविडया महामारी लिपा कासा जुइपि अप्पोया वंगु दु। ‘नेपालय् न क्रिकेटप्रति मोह अप्पोया वंगु दु। जिमिसं आयोजना यानागु कासा निगु देया ल्याम्हयपि दथुइ मैत्री सम्बन्ध स्थापना जुइगु भलसा कयागु दु।’ राजदूत शाहं धयादीगु खः।

प्रतिस्पर्धाय् १२ टीम दु। प्यंगु समूहय् विभाजन याना छगु समूहय् निगु कासा म्हितीकिइगु खः। थुकिइ शीर्ष स्थान लागु प्यंगु टीम सेमिफाइनलय् थ्यकिइ। सेमी फाइनलया विजेतापि फाइनल प्रतिस्पर्धा याइ। कासा थ्व हे फागुन २६ गते क्वचाइ।

Categorized in कासा