अन्नपूर्ण देवी (असं भलु अजिमा) या द्यःछेँ पुननिर्माणया लागि शिलान्यास जुगु दु। येँ महानगर वडा २७ भोटाहिटीइ निर्माण जुगु थौं छगु ज्याझ्वः दथुइ महानगरया मेयर विद्यासुन्दर शाक्यं शिलान्यास यानादीग खः।

उगु द्यः छेँय् अन्नपूर्ण अजिमाया तिसाः, द्यः जात्राया मूर्ति नाप सम्बन्धित बाजं तयातइगु थाय् ख। शिलान्यास लिपा न्ववासे मेयर शाक्यं, सांस्कृतिक सम्पदाया मर्मत सम्भार व पुननिर्माणया लागि गुठीयारपिनिगु स्रोत मगाउगुलि राज्यपाखे महानगरं ग्वाहालि यानागु उल्लेख याउगु खः।

‘जिमिसं सम्पदा पुननिर्माणय् लगानी याये धका कार्यकालया सुरुनिसे धया वयाच्वनागु खः। उगु इलय् महानगरं लगानी यातकि सांस्कृतिक संरचना लितका वइ धका भ्रम फैलै याउगु खः। पुननिर्माण याना सञ्चालन व्यवस्थापनया लागि सम्बन्धित गुठीयारपिन्त जिम्मा बिइ धका धया वयाच्वनागु दु। गुठीयारपिन्स आः खँ थुइ धुकुगु दु। आः काःवःपि यक्को दत।’

‘सम्पदा पुननिर्माणय् जिमिगु कार्यकाल गुलि जुल मेगु इलय् जुगु मदुनि। दुने व पिने सहरी बस्तीया अवस्था, सामाजिक परिवेश कथं नवनिर्माण व पुननिर्माणय् ज्या यानागु दु।’ शाक्यं धयादीगु दु, ‘येँया इतिहास सम्पदानाप स्वाउगु दु। थुकियात बचे याना पर्यटन व्यवस्थापननाप अन्तरसम्बन्धित याये।’ तहगत सरकारया जिम्मेवारीमध्ये संस्कृति, सम्पदा, भाषा, कला, साहित्य बचे यायेगु जिम्मा स्थानीय सरकार याः खः।

उपमेयर हरिप्रभा खड्गी श्रेष्ठं धयादीगु दु, ‘जिमिसं सम्पदा बचे यायेगु नीति कार्यान्वयन यानागु दु। थुकिया लिच्वः वयाच्व.गु दु।’ द्यः छेँया पुननिर्माण अन्नपूर्ण द्यः छेँ उपभोक्ता समितिं दयकिइ।

समितिया अध्यक्ष रमेश महर्जनया कथं द्यः छेँय् पुननिर्माण २०७९ पुस मसान्त तक यायेगु लक्ष्य दु

२ आना २ दाम जग्गाय् निर्माण जुइगु भवन ४ तल्लाया जुइ। थुकिया पुननिर्माणया लागि महानगरं करिब ७६ लाख रुपैयाँ उपलब्ध याउगु खः।  महर्जनया कथं नेपाल संवत ९३१ य् द्यः छेँ पुननिर्माण जुगु शिलापत्र लुगु दु। तर गुवलय् द्यःछेँ दयकूगु धका सिइमदुनि। 

Categorized in राष्ट्रिय