नेवाः देय् दबू स्वनिगः विशेष प्रदेशपाखें स्वनिगःया झिंच्यागू नगरपालिकाया नितिं झिंच्यागू हे बुँदाया नेवाः मंकाः अडान पौ सार्वजनिक याःगु दु।

थौं शुक्रवाः पत्रकार सम्मेलनयासें उगु अडान पौ सार्वजनिक याःगु खः देय् दबूया केन्द्रीय अध्यक्ष पवित्र बज्राचार्यं स्वनिगः विशेष प्रदेशं तयार याःगु नेवाः मंकाः अडान पौयात कया स्वनिगःन्यंकं हे अभियान न्ह्याकेमाःगु खँय् बः बियादिल । देय् दबू स्वनिगः विशेष प्रदेशया अध्यक्ष श्रीकृष्ण महर्जनं नेवाः मंकाः अडान पौया महत्वयात कनादिसें आः चुनाव तकया दुने राजनीतिक दल व उम्मेदवारतय्त लःल्हायेगु नाप नापं नेवाः वस्ती वस्तीइ वना थुइकेगु अभियान न्ह्याकेगु जुइ धयादिल।

वय्कलं चुनाव लिपा नं नेवाः मंकाः अडान पौ कथं ज्या यायेगु नितिं खबरदारी यायेगुनिसें निरन्तर रुपं दबाव बिइगु ज्या जुयाच्वन धकाः नं धयादिल ।

स्वनिगः विशेष प्रदेशया अध्यक्ष महर्जनं ल्हाःचिं तया सार्वजनिक यानादीगु नेवाः मंकाः अडान पौ थुगु कथं दुः।

नेवाः मंकाः अडान पौ

२०७९ बैशाख ३० गते जूवनाच्वंगु स्थानीय तहया चुनावयात ध्यानय् तया स्वनिगःया आदिवासी नेवाः समुदायपाखें मंकाः अडान पौ तयार यायेमाःगु ठहरयासें, नेपाःया संविधानसभापाखें दयेकूगु न्हूगु संविधान, स्थानीय सरकार संचालन ऐन, आदिवासी जनजाति सम्वन्धी अन्तर्राष्ट्रिय श्रम संगठन महासन्धि नं. १६९ (आइएलओ १६९), आदिवासी जनजातिया अधिकार सम्वन्धि संयुक्त राष्ट्रसंघीय घोषणा पत्र (युएनड्रिप)या आधारय् स्थानीय सरकारपाखें ऐन पारित याना कानुन तकं दयेकेमाःगुलिं स्वनिगःया आदिवासी नेवाःतपाखें थ्व अडान पौ तयार याःगु खः ।

थ्व अडान पतिइ दुथ्याकगु कथंया आदिवासी नेवाःतय्गु मुद्दा सम्वोधन यायेत राजनीतिक दलनिसें दलया उम्मेदवार व मेपिं उम्मेदवारतयत कन्हय्या दिनय् स्थानीय सरकारय् वना कार्यान्वयन यायेत÷याकेत नेवाः समुदायपाखें बिइत व स्वयं नेवाः समुदाययात थुगु मुद्दायात आदिवासी नेवाः समुदयया हे खः धकाः थुइकेगु व उकिया नितिं जनस्तरय् अभियान न्ह्याकेगु नितिं तयार याःगु खः । नेवाः समुदायया थीथी जातीय खलः, अभियन्ता, संघ संस्था÷खलः पुचःनिसें सरोकारवालापक्षलिसे तःक्वःमछि सहलह लिपा नेवाः समुदायया मंकाःगु राष्ट्रिय संगठन नेवाः देय् दबू स्वनिगः विशेष प्रदेशपाखें नेवाः समुदायया मंकाः अडान पौ सार्वजनिक यानागु खः । सार्वजनिक जुइवं थुकियात कार्यान्वयनया नितिं नं मदिक्क भूमिका म्हितेगु जुइ ।

१) स्थानीय तहलय् स्थानीय मातृभाषा अर्थात नेपाल भाषायात नं कामकाजि भाषाया रुपय् मान्यता बिइमाःगु व पालिका दुनेया संघ, प्रदेश व स्थानीय सरकार मातहतया निकाय व ज्याकुथिइ नं नेपालभाषायात कामकाजि भाषाया रुपय् छ्यलाबुलाये हयेकेगु ।

२) स्थानीय पाठ्यक्रम स्थानीय मातृभाषा नेपालभाषाया माध्यमं हे छगू तगिंनिसें च्यागू तगिं तक ब्वंकेगु व्यवस्था यायेमाःगु ।

३) पालिका दुने छुं नं कथंया जनशक्ति मालीगु अवस्थाय् स्थानीय मातृभाषा सःपिन्त विशेष प्राथमिकता बिइगु ।

४) नेवाःतय्गु पुलांगु वस्तीया मूर्त÷अमूर्त संस्कृति सम्पदायात लिच्वः मलाकीगु कथं जक उगु लागाया छेँ जग्गा मिइगु नितिं घरवाटोया सिफारिसया व्यवस्था यायेगु ।

५) स्वनिगः दुने थीथी थासय् न्ह्यलाथे नां तयेगु यानाच्वंगु दु । थज्वःगु ज्यायात तत्काल हे दिका स्थानीय पहिचान, इतिहास, संस्कृति, सभ्यतानाप स्वापू दुगु प्राचिन नां तयेगु ।

६) संविधानया धारा ३२ सं दुगु संस्कृति÷सम्पदा सम्बन्धि मौलिक हकयात आत्मासाथयासें विकास निर्माण, सडक विस्तार बाय् छुं नं कथंया त्वहः तया संस्कृति सम्पदायात नष्ट याये दइमखु ।

७) संविधानया धारा २५ सं व्यवस्था दुगु निजी सम्पत्ति सम्वन्धि मौलिक हक, व धारा ३७ सं व्यवस्था दुगु आवास सम्बन्धि मौलिक हक कथं लिकल्प दतले सडक विस्तार याये दइमखु।

८) सर्वोच्च अदालतया आदेशयात पालनयासें सडक सिमा व सडकया मापदण्ड सरोकारवाला पक्षया सहमित कया जक कायम यायेमाः ।

९) विकास निर्माण लगायत छुं नं कथंया त्वहः तया जबरजस्ती विस्थापित मयायेगु, आदिवासी नेवाःतय्गु सवालमा आइएलओ १६९ व युएनड्रिप कार्यान्वयन पूर्वसर्त खः, उकिं पूर्व सुसूचित जानकारी मन्जुरी कया जक योजना तर्जुमा, कार्यान्वयन व संचालन यायेगु नापं विस्थापित जूपिं दुसा पुनस्थापित यायेगु।

१०) आदिवासी नेवाः समुदायया संस्कृतिलिसे स्वापू दुगु सामुहिक भूमिया संरक्षण सम्वद्र्धन यायेगु  नापं अतिक्रमण याके मबिइगु।

११) प्राचिन ऐतिहासिक एवं सांस्कृतिक नेवाः वस्तीयात सांस्कृतिक संरक्षित क्षेत्र घोषणा याना नेवाः आदिवासीतय्गु प्रथाजन्य संस्था गुथिया प्रतिनिधित्व याका स्वायत्त संरचना निर्माण यायेमाः ।

१२) आदिवासी नेवाःतय्गु प्रथाजन्य संस्था गुथियात कानुनी मान्यता बिइगु।

१३) पालिका दुनेया भूमि व्यवस्थापनया नितिं बैज्ञानिक भू उपयोग नक्सा तयार याना कार्यान्वयन यायेगु।

१४) पालिका दुनेया संस्कृति, सम्पदा संरक्षण यायेगु, सम्पदा पुनः निर्माण यायेगु झ्वलय् पुरातात्वीक नापं नेवाः वास्तुकलाया आधारय् यायेगु नापं सम्पदा पुनः निर्माणया झ्वलय् स्थानीयवासीया उपभोक्ता समितिपाखें जक यायेगु।

१५) प्राचिन नेवाः वस्तीइ नेवाः पहः वयेक छेँ दनीपिन्त विशेष सहुलियत बाय् ग्वहालिया व्यवस्था यायेगु।

१६) पालिका दुनेया संघ संस्था, खलः पुचः, पसःनिसें सरकारी कार्यालय, निकाय व पालिकानाप स्वापू दुगु थीथी ज्याकुथिइ साइनबोर्डय् स्वनिगलय् हे विकसित जूगु प्रचलित नेपाल लिपि बाय् रञ्जना लिपि अनिवार्य रुपं तयेकेगु । प्रचलित व रञ्जना लिपि नं तःपिन्त  विशेष सहुलियत बाय् ग्वहालिया व्यवस्था यायेगु।

१७) आदिवासी नेवाःतय्गु ज्ञान, शीप, प्रविधियात संरक्षण व सम्वद्र्धन यायेगु।

१८) स्थानीय भाषा नेपालभाषाया विद्यार्थीपिन्त छात्रवृत्तिया व्यवस्था यायेगु ।

Categorized in राष्ट्रिय