शिक्षाय् आमूल परिवर्तन हय् –हरिकृष्ण व्यन्जनकार
नृपेन्दलाल श्रेष्ठ | बछलाथ्व षष्ठी ११४२, बैसाख २४ सनिवाः
जिं २०४३ सालनिसें यल महानगरपालिकालिसे सम्बन्धित जुयाः ज्या यानावयागु दु। २०४९ सालय् नगर कमिटी सचिव जुयाः ज्या यानासा २०६६इ जिल्ला उपाध्यक्ष व २०६९इ अध्यक्ष जुया। जनप्रतिनिधि मजुयागु इलय् नं जिं पार्टीयापाखें नगरया बोर्डय् प्रतिनिधित्व यानाच्वनागु खः। जिं महानगरबारे समग्र रूपं स्यू। जितः नगरपालिकावासीया लागिं यानागु सेवाया हे कारणं २०७४ सालय् पार्टीं टिकट ब्यूगु खः। आः नं पनि सर्वसम्मत ढंगं जितः पार्टीं टिकट ब्यूगु दु। आः मेयर जुयावयाः यल महानगरपालिकायायात विकास व समृद्धिया लँपुइ यंकेगु योजना जिके दु। समृद्ध धाय्बलय् भौतिक विकास, शिक्षा व स्वास्थ्यलिसें व्यवहार व सोचय् नं विकास खः । जिमिसं शिक्षाय् आमूल परिवर्तन हय्। स्वास्थ्यय् नं तःधंगु ह्यूपाः हय्गु जुइ।
यल महानगरपालिका सांस्कृतिक पक्षय् नं तःमि थाय् खः। हलिमय् दकले ताःहाकःगु जात्रा नं थन हे जुइ । कात्ति प्याखं, पायाः, जाह्वलाजात्रा नं थन हे जुइ। महानगर जुइधुंकाः स्वाःवःगु ख्वना, बुङ्ग, सुनागुथि, धापाखेल, हरिसिद्धिं सांस्कृतिक पक्षयात अझ विशाल दय्कूगु दु। थनया थज्याःगु मूर्त अमूर्त सम्पदालिसें अजूचायापूगु तान्त्रिक अभ्यासया संरक्षण सम्वद्र्धन यासें थप समृद्ध याय्गु जुइ। १९९० सालय् ध्वस्त जूगु देगःत दय्के अझं ल्यं दनि। व देगःत नं दय्केगु जुइ। थनया हस्तकलाया ज्यायात थप प्रभावकारी ढंगं न्ह्यःने यंकेगु योजना दु।
शिक्षायात सकसिगु पहुँचय् हय्त जिं ज्या याय्। शिक्षा ख्यलय् जिगु पुलांगु अनुभवन दु । न्हापा २०३७ सालनिसें शिक्षण पेशा यानागु जिगु इतिहास दु। २०४०य् श्रमिक शान्ति स्कुल च्यासःया प्रधानाध्यापक जुयाबलय् मुक्कं निसः विद्यार्थी व १२ जक कक्षाकोठा दुगु खः। सरकारी विद्यालयय् भवन दु, पढाइ जुइमखु। सरकारी स्कुल बांलाकेमाः धइगु जितः ताल। अन जिं अंग्रेजी माध्यमं पढाइ न्ह्याका।
२०४८ सालय् जिं व स्कुल त्वःताबलय् विद्यार्थी संख्या १५सः थ्यनेधुंकूगु खःसा ५५ कक्षाक्वथा थ्यनेधुंकल। आः महानगर दुनेया दक्वं सरकारी स्कूलयात व हे कथं भिंकेगु नितिं ज्या याय्गु ह्वःताः वःगु दु। जिं व हे कथं थनया सरकारी स्कूलयात बांलाकाः क्यने।७० दँ पुलेधुंकूपिं ज्याथः नागरिकतय्त सितिकं उपचार बीगु बिचाः नं दु। प्रत्येक नागरिकयात स्वास्थ्य सेवा बी फय्केत आः वडाय् दुगु स्वास्थ्य केन्द्रयात प्रभावकारी दय्काः वासः व नियमित जाँचया व्यवस्था याय् ।
भौतिक पूर्वाधारय् नं ह्यूपाः वइ। २०८४ या वैशाखतक्कय् थनया दक्वं लँ पक्की जुइ धुंकी। आवश्यकता कथं ल्वहँ लाय्गु, ब्लक तय्गु, ढलान व पिच याय्गु ज्या व दक्वं सडक प्रविधिमैत्री जुइ। सडकय् मुख्यमुख्य थासय् जडान जुइगु सिसी क्यामेरां वडाध्यक्षं लाया अवस्था सीकेफइ। त्वनेगु लःया समस्या पूर्ण रूप समाधान याय्। आः फोहोरमैला व्यवस्थापनय् दँय् १५÷२० करोड खर्च जुयाच्वंथाय् ५ करोड लगानी यानाः मेसिन हय्, गुकिं न्हिं १० टन फोहोर प्रशोधन याइ। थुकिं ग्याँस, विद्युत् व मल पिहांवइ।
न्हापाया स्थानीय निर्वाचनय् जि त्याय्मफुसां फक्व ज्या यानागु दु तर त्यानावःम्हं ज्या याय्त ग्याःगु खना। पूर्वाधारया विकासय् जि सक्रिय जुया। २०७४÷७५य् वागमती गाउँपालिकां छगु वडायात १ करोड ब्यूबलय् यल महानगरपालिकां वडायात ७०÷७५ लाख जक बिल। १५ करोड थःके हे तल तर, क्वय् धेबा मब्यू। अन्तिम दँय् हरेक वडां ५ करोड फ्वने धया। न हिँ धाइम्हेसिनं आँट यात, न महानगरं हे बिल। ६ अर्ब बजेटय् छगू वडायात ५ करोड बिल धाःसा १ अर्ब ४५ करोड जुइ। आः जिं वडायात स्रोतसाधन व अधिकार सम्पन्न दय्के। अथे हे, भ्रष्टाचारय् शून्य सहनशीलता लीगु जिमिगु नीति दु। सुशासनया लागिं कर्मचारी इलय् वय्गु व वनेगु लसक बीमा, ज्या कथंया सुविधा बीमाः। तलब भत्ता थकयाः जूसां जनतां सेवा काय्खनेमाः धयागु बिचाः दु। ज्या नं व हे कथं यानाः जनतायात सहज दय्केगु जुइ।