२०८० चैत्र १६, शुक्रबार

निर्वाचन बाहेक मेगु ला छुं ध्यान हे मदु

काजीरत्न | बछलागा द्धादशी ११४२, जेष्ठ १३ शुक्रवाः

निर्वाचनमय झी, झी जक मखु, मुक्कं देय् निर्वाचनमय जुयाच्वंगु दु। सकसिया ध्यान निर्वाचनया लिच्वलय् अझ मुक्कं देय्या ध्यान येँ महागनरय् हे। येँ महानगरवासी जक मखु, मुक्कं देय्या छम्ह उम्मेदवार त्याइ कि मत्याइ धइगुलिइ ध्यान। थन मेपिन्त बुकाः व छम्ह उम्मेदवार त्यात कि यमितलिसेया युद्ध हे त्याइगु जुल धइथें गुलिसिनं सामाजिक संजालय् खुल्ला रुपं हे च्वयाच्वंगु दु। का, हाकनं छता धाय्त्यनागु, व हे निर्वाचनया खँ जक ताःहाकयावन का।
 
मुक्कं देय् गपाय्सकं निर्वाचनमय जुयाच्वंगु खः ? निर्वाचन बाहेक मेगु ला छुं ध्यान हे मदु। आः स्वयादिसँ ले, म्हिगः बैसाख पुन्हि अर्थात स्वांया पुन्हि, बुद्ध जयन्ती। छम्ह उम्मेदवार त्याइ कि मत्याइ धकाः स्वस्वँ महामानवयात हे ल्वःमंकाबिया का झीसं। थुगुसी थें सुंसां दंगु स्वांया पुन्हि आःतक मखनानि का। फेसबुकय् बुद्धया फोटो ब्वःपिं, स्वयम्भु चाःह्यूवनाः सेल्फी तःपिं तक हे खनेदुगु मखु।
 
व जक मखु, पेट्रोलियम पदार्थया भाः थहांवन नि स्यूला ? न्हापा जूसा कम से कम सामाजिक संजालय् सां चिकंया मूल्यबुद्धिया विरोध जुइगु खः तर, थुगुसी ला व हे छम्ह उम्मेदवारया खँ बाहेक पेट्रोलियम पदार्थया भाः थहांवंगुया ला वास्ता नं मदु। चुनावया दथुइ जनतां मेगु छुं हे वास्ता याइमखु धकाः सरकार व नेपाल आयल निगमं नं बांलाक हे थूगु जुयाच्वन नि। अय्जुयाः ला चुनावया ठिक कन्हय्कुन्हु चान्हय् काचाकाचां पेट्रोलया भाः थकयाब्यूगु। गुलिं मनूत ला मोटरसाइकलय् पेट्रोल जाय्केत पेट्रोल पम्प थ्यंबलय् थारान्हुल जुइ। का, गबले भाः थहांवंगु हाकनं धकाः अजूचाल जुइ।
 
अझ थुगुसी ला प्यतका, न्यातका थकाःगु ला ! पेट्रोल, डिजेल व मत्चिकं स्वंगुलिं नं झितका झितका मछि थकयाब्यूगु दु। आः लिपाया पालय् झिंन्यातका थकाइ जुइ। थकाल ला थकाल, दकले अजूचायापूगु खँ ला, न्ह्याक्व धेबा थकाःसां नेपाल आयल निगम धाःसा घाटाय् हे का। व नं अर्बौंया घाटा।
 
थ्व दक्वं खँ जुयाच्वंसां झीत ला छु मतलब ? झी दक्व, नेवाःत जक मखु, दक्वं नेपालीतय्त ला छम्ह उम्मेदवारया चिन्ता का। समर्थन याइपिं समर्थनय् तिं तिं न्हुन्हु मलाः, विरोध याइपिनि नं व हे छम्ह उम्मेदवारया विरोध यायां मलाः। चिकंया भाः थहांवन, लिपा जा थुइत ग्याँस दइला मदइला, विकल्पय् झी वनेमाःगु खः कि, वनेमाःगु खःसा विकल्प छु जुइ थुकी सुया च्यूताः दु धकाः। आःयात व हे छम्ह उम्मेदवार त्याइ कि मत्याइ नि स्वय् का।