सञ्चार माध्यम त्वःताः राजनीतिइ प्रदेश जुयादीम्ह सञ्चारकःमि रवि लामिछानें चायेकूगु ‘राष्ट्रिय स्वतन्त्र पार्टी’ या लोगो वहे नांया छगू अमेरिकी राजनीतिक पार्टीया लोगोलिसे हुबहू मिले जूगु किपा पिहां वःगु दु।

सामाजिक सञ्जालय् निगू पार्टीया लोगो छथासं तयाः चर्चा जुगु दु। अमेरिकाय् न्हापा हे दुगु ‘अमेरिकन फ्रिडम पार्टी’ या नां ‘राष्ट्रिय स्वतन्त्र पार्टी’ लिसे गनं गनं मिले जूगु खनेदुसा निगुलिं पार्टीया लोगो ‘गं (घन्टी)’ नं मिले जुयाच्वंगु दु ।

अथे हे निगुलिं पार्टीया लोगोया पिने नगु (तारा) चिं तयातःगु दु । अमेरिकन पार्टीया चिन्हय् १३ गः तारा दुसा नेपाःया स्वतन्त्र पार्टीया लोगोय् ७ प्रदेशया प्रतीक कथं ७ गः हे तारा तयातःगु दु । निगू पार्टीया थ्व समानतायात कयाः थन थीथी कथंया न्ह्यसः नं पिहां वयाच्वंगु दु। लामिछाने छगू इलय् अमेरिका वनाः वहे देशया नागरिकता समेत कयाः च्वनाच्वने धुंकूम्ह खः।

वय्कः अमेरिकां लिहां वयाः नं अनया नागरिकता त्याग मयासे हे नेपालय् पत्रकारिता यानाच्वंगु जुयाः तःधंगु विवाद जूगु खःसा विवाद पिहां वयेवं तिनि वय्कलं अमेरिकाया नागरिकता त्याग यानादीगु खः। तर अमेरिकाया नागरिकता त्याग याःसां नं वय्कःया उच्चस्तरया आर्थिक हैसियतयात कयाः धाःसा नेपालय् न्ह्यसः पिहां वयेगु यानाच्वंगु दु।

Categorized in राष्ट्रिय