येँ महानगरपालिकाया उपमेयर सुनिता डंगोलं २५ अर्ब ४१ करोड ९६ लाख ९६ हजारया बजेट पेश याउगु दु।

चालु आर्थिक वर्ष २०७८÷७९ य् १८ अर्ब ९५ करोड ७७ हजारया बजेट कार्यान्वयन याउगु येँ महानगरपालिकां आर्थिक वर्ष क्वचाय् लच्छि न्ह्यः जक ५ अर्ब ९६ करोड ५९ लाख ६४ हजार मात्र खर्च जुगु खः। नगरसभाय् उपमेयर डंगोलं प्रस्तुत याउगु बजेट वक्तव्य कथं वइगु दँय् पूर्वाधार विकास क्षेत्रया लागि ११ अर्ब ८ करोड ८९ लाख ३ हजार बजेट बिनियोजन याउगु दु। थ्व धइगु कुल बजेटया ४९.५७ प्रतिशत खः ।

चालु आर्थिक दँय् ११ महिनाय् महानगरपालिकां पूर्वाधारपाखे २ अर्ब २६ करोड ८१ लाख ४६ हजार रुपैयाँ खर्च याउगु खः। आगामी आर्थिक वर्ष महानगरपालिकाया सञ्चित कोषपाखे २२ अर्ब ३६ करोड ९५ लाख ४९ हजार खर्च जुइ। सामाजिक सुरक्षा भत्ता लगायत नेपाल सरकार, प्रदेश सरकार व जग्गा एकीकरण आयोजनापाखे जुइगु आम्दानी सञ्चित कोष बाहेकया बजेटपाखे कार्यान्वयन याइ।

स्थानीय सञ्चित कोषपाखे खर्च जुइगु रकम मध्ये आर्थिक विकास क्षेत्र अन्तर्गतया कार्यक्रम लागि ५० करोड २१ लाख २४ हजार (२.२४ प्रतिशत) विनियोजन याउगु दु। कार्यालय सञ्चालन व प्रशासनिक क्षेत्रया लागि ४ अर्ब ६८ करोड ९८ लाख ६० हजार विनियोजन याउगु दु, थ्व धइगु कुल बजेटया २०.९६ प्रतिशत खः।

पूर्वाधार विकास क्षेत्रया लागि ११ अर्ब ८ करोड ८९ लाख ३ हजार बजेट विनियोजन याउगु खः, उगु कुल बजेटया ४९.५७ प्रतिशत जुइ। सामाजिक विकास क्षेत्रया लागि १ अर्ब ६२ करोड २८ लाख २२ हजार बजेट विनियोजन याउगु खः, थ्व धइगु कुल बजेटया ७.२५ प्रतिशत खः।

सुशासन व अन्तरसम्बन्धित क्षेत्रया लागि ४ अर्ब ४६ करोड ५८ लाख ४० हजार बजेट बिनियोजन याउगु दु, थ्व कुल बजेटया १९.९६ प्रतिशत जुइ धका उपप्रमुख डंगोलं जानकारी बिउगु खः। नेपाल सरकार व प्रदेश सरकारपाखे वइगु सशर्त अनुदानपाखे १ अर्ब ३१ करोड ३७ लाख ६ हजारया श्रोत सुनिश्चित दु धका बजेट वक्तव्यय् उल्लेख याउगु दु।

महानगरपालिकां बजेटया तुलनाय् राजश्वया लक्ष्य थकाउगु मदु। चालु आर्थिक वर्षय् महानगरं ४ अर्ब  ६६ करोड रुपैयाँ राजस्व लक्ष्य काउगु दु। वइगु आर्थिक वर्षया लागि ४ अर्ब ८० करोड संकलनया लक्ष्य काउगु दु। वइगु वर्षया लागि महानगरपालिकां ११ अर्ब ९५ करोड बैंक मौज्दात दुगु रकमपाखे खर्च यायेगु लक्ष्य तःगु दु। थुगु कथं महानगरं आन्तरिक स्रोतपाखे १६ अर्ब ८० करोड १ लाख रुपैयाँ खर्च याइ।

Categorized in राष्ट्रिय