संस्कृति, पर्यटन तथा नागरिक उड्डयनमन्त्री जीवनराम श्रेष्ठं पशुपति द्यःया अवलोकन व निरीक्षण यानादीगु दु। मन्त्री श्रेष्ठं पशुपति दुने थीथी थासय् वना निरीक्षण नाप व्यवस्थापन पक्ष जानकारी कयादीगु दु।

मन्त्री श्रेष्ठं पुनर्निर्माण जुयाच्वंगु सम्पदा, विश्वरुपा द्यः मृगस्थली, श्लेषमान्तक वन, थीथ द्यः, स्तूपा, सत्तः लगायतया अवलोकन यानादीगु खः। अवलोकन नाप निरीक्षण याये धुका वयकलं पशुपति क्षेत्र व देगःया जःखः सरसफाइ यायेत ध्यान बिइत पशुपति क्षेत्र विकास कोषयात निर्देशन बियादीगु दु।

वयकलं भक्तजन, तीर्थयात्री, पैदलयात्री नाप पर्यटकपिन्त याउक दक्को प्रबन्ध मिले यायेत निर्देशन बिउगु खः। मृगस्थली क्षेत्रय् लिच्छविकालीन विश्वरूपा द्यःया पुनर्निर्माणया अवस्था व घाट व्यवस्थापनबारे न जानकारी कयादीसृ वयकलं लः, मत नाप सार्वजनिक शौचालय व्यवस्थापन याना याउक सेवा प्रवाह यायेत निर्देशन बियादीगु दु।

सरकारं पशुपति क्षेत्र सुधार ज्याझ्ःयात राष्ट्रिय गौरवया आयोजनाया रूपं तयातःगु दु।

Categorized in राष्ट्रिय