२०७९ आश्विन २०, बिहिबार

येँ महानगर व नर्भिक अस्पताल दथुइ सहमति जुगु इलय् हे थुनेत तयार

लहनान्युज | लाथ्व द्धादशी ११४२, साउन २४ मंगलवाः

येँ महानगरपालिकाया मेयर बालेन्द्र साह (बालेन) न नर्भिक अस्पतालं दयकूगु संरचना हटे यायेत मानवीय संवेदनाया आधारय् ई बियागु धका धाउगु दु।

मंगलबाः न्हिनय् नर्भिक अस्पताल वना बालेनं सामाजिक सञ्जाल फेसबुक पाखे स्पष्टीकरण बिउगु दु, ‘कानुन सकसिगु लागि बराबर खः धइगुलि जिपि प्रष्ट दु।

सतकय् जुइमा वा महलय् जुइमा, कानुनया पालना बराबर किसिमं जुइमाः। नर्भिक अस्पतालय् कानुनया पालना यायेत ई बियागु दु।’ नर्भिक अस्पतालं भाडाय् कया १ रोपनी ८ आना जग्गाय् नक्सापास मयासे संरचना दयकूगुलि येँ महानगरपालिकां सोमबाः २४ घण्टा दुने थुकनेत अल्टिमेटम बिउगु खः।

वया लिपा मंगलबाः न्हिनय् बालेन थः हे अस्पतालय् वंगु खः। वयालिपा नर्भिक अस्पतालया अध्यक्ष राजेन्द्रबहादुर सिंहं अस्पतालया सेवा प्रभावित जुइ धका धासे तत्काल संरचना थुनेफइ मखु धका धाउगु खः।

वयालिपा मेयर बालेन व अस्पताल प्रशासन दथुइ येँ महानगरपालिका व अस्पतालया प्राविधिकं तोके याउगु इलय् हे संरचना थुनेयेगु सहमति जूगु खः।

Categorized in राष्ट्रिय