भारतय् जूगु न्हापागु टी–२० क्रिकेटय् अष्ट्रेलिया विजयी जूगु दु। मोहालीइ वंगु चान्ह्यः जूगु कासाय् भारतयात अष्ट्रेलियां प्यंगू विकेटं पराजित याःगु खः।

थुगु कासा नाप स्वंगु टी–२० कासाय् अष्ट्रेलिया १–० न न्ह्यने लागु दु। भारतं बिःगु २ सय ९ रनया लक्ष्य अष्ट्रेलियां १९ ओभर २ बलय् खुगु विकेटय् पूरा याःगु खः।

अष्ट्रेलियाया क्यामरुन ग्रीनं ६१ रनया अर्धशतकीय म्हितूगु खः। अथेहे म्याथ्यु वेडं अविजित ४५ रन दयकूगु खः। भारतया अक्षर पटेलं स्वंगु व उमेश यादवं निगु विकेट काःगु खः।

व स्वया न्ह्यः ब्याटिङ याःगु भारतं २० ओभरय् खुगु विकेटय् २ सय ८ रन दयकूगु खः। भारतया हार्दिक पाण्डेय व केएल राहुलं अर्घशतकीय म्हितूगु खः। पाण्डेय न अविजित ७१ रन व राहुलं ५५ रन दयकूगु खः।

अष्ट्रेलियाया नाथन एलिसं स्वंगु जोश हाजलउडं निगु विकेट काःगु खः। मेगु टि–२० कासा शुक्रबाः व आइतबाः जुइ।

Categorized in कासा