वय्कःयात संविधानविद् व संघीयताविद् कथं नं काय्गु याःसा नेपाली राजनीति क्षेत्रय् समाजवादया प्रणेता कथं नं वय्कःया नां न्ह्यःने वः । न्हापा थन कम्युनिष्ट पार्टीया लहर वःगु खः । नेकपा (एमाले) पार्टीं बायाः पिहांवःपिं अशोक राई, राजेन्द्र श्रेष्ठ लगायतया पुचलं न्हूगु पार्टी दय्कल । उगु पार्टीया नां च्वन, ‘संघीय समाजवादी पार्टी नेपाल ।’ थ्व पार्टीया नां व विधान दय्केगुलिइ राजेन्द्र श्रेष्ठया मू भूमिका दुगु खँ पार्टीयापिन्सं धयावःगु दु । ई कथं थुगु पार्टी मेमेगु पार्टीलिसे एकिकरण यायां पार्टीया नां नं हिल । संघीय समाजवादी फोरम नेपाल, समाजवादी पार्टी नेपाल, जनता समाजवादी पार्टी नेपाल । न्ह्यागु नां च्वंसां समाजवादी धाःसा ल्यना हे च्वन ।

 

राजेन्द्र श्रेष्ठया अवधारणा समाजवाद पार्टीं गबलें हे मत्वःतू । लिसें थुगु पार्टी त्वःताः पिहांवंपिन्सं नं समाजवादया सिद्धान्त ज्वन । जसपा बायावंगु मधेशवादी नेतातय्सं लोकतान्त्रिक समाजवादी पार्टी धकाः नां तल सा बाबुराम भट्टराईं नं नेपाल समाजवादी पार्टी तल । उलि जक मखु, नेकपा एमालें बायाः पिहांवःम्ह माधव कुमार नेपालं नं नेपाल कम्युनिष्ट पार्टी (एकिकृत समाजवादी) धकाः पार्टीया नां तल । थज्याःगु अवस्थाय् वर्तमान इलय् राजनीतिक क्षेत्रय् समाजवादया लहर हःम्ह नेता धकाः थुकीया श्रेय राजेन्द्र श्रेष्ठयात हे बीगु यानाच्वंगु दु । 

 

म्ये च्वय्गु, हालेगुलिइ नं जाःम्ह राजेन्द्र श्रेष्ठं थ्वयां न्ह्यः सांसद जूबलय् संसदय् थीथी मुद्दा ल्ह्वनाः जनताया सः न्ववाइम्ह नेता कथं थःगु छवि दय्केधुंकूगु दु । राज्यं ययःथे लालाःथाय् डोजर चले यानाः विना क्षतिपुर्ति जनताया छेँ थुनाच्वंगु इलय् वय्कलं उकिया विरुद्ध संसदय् सः तयादीगु खः । नापं आवास सम्वन्धि विधेयकय् संशोधन प्रस्ताव तयाः विना क्षतिपुर्ति जनताया छेँ थुने मदइगु व्यवस्था सुनिश्चित यानादिल । शिक्षा सम्वन्धि विधेयकय् नं वय्कलं हे संशोधन प्रस्ताव तयाः मातृभाषा शिक्षा सुनिश्चित याकादिल । थ्व हे विधेयकय् चुयाः आः येँ महानगरपालिका, किपू नगरपालिका, यल महानगरपालिकां स्थानीय मातृभाषां स्थानीय पाठ्यक्रम लागू याय्धुंकूगु दु ।

 

ऐतिहासिक कमलपोखरीयात न्हंकाः दय्कूगु व्यापारिक भवन छायाँ कम्प्लेक्सयाबारे संसदय् सः तयादिल, गुठी विधेयकविरुद्ध सः ल्ह्वनादिल । तत्कालीन प्रधानमन्त्री केपी ओलीं निक्वः निक्वः संसद विघटन याःबलय् नं संसद पुनस्र्थापना याकेत लिसें वर्तमान सत्ता गठबन्धन दय्केत विशेष भूमिका म्हितूम्ह कथं राजेन्द्र श्रेष्ठया हे नां वइ । उलि जक मखु, वय्कः मन्त्री मखुबलय् वा पदय् मदुबलय् नं २०७२ सालय् भुखाचं पिडित जूपिं पुलां गुह्येश्वरीया परिवारयात वय्कलं पहल यानाः १२० खा छेँ दय्कादीगु दु ।

 

राजेन्द्र श्रेष्ठं थज्याःगु यक्व हे जनताया मुद्दा ल्ह्वनादीगु दु । अथेसां वय्कः मेपिं थें हल्ला याय्गु, क्रेडिट नय्गुलिइ धाःसा ल्यूने लाः । थुकथं हल्लाबाजी यानाच्वने वय्कःयात मयः हं । ‘जिं ला थःगु कर्तव्य पूवंका च्वनागु खः । उकियात सामाजिक संजालय्, संचार माध्यमय् प्रचारबाजी यानाः जुइमाः थें जितः मताः । थःगु ज्या याय्गु खः । आः नं व हे ज्यायात निरन्तरता बीत हे उम्मेदवारी बियागु दु’ नेता श्रेष्ठं धयादिल ।