‘सक्षम ल्याय्म्ह नेतृत्वया लागिं जिगु उम्मेदवारी’ शैलेश रत्न शाक्य
लहनान्युज | कछलागा षष्ठी ११४३, कार्तिक २८ सोमवाः
वइगु मंसिर ४ गते जुइगु आम निर्वाचनय् प्रदेशसभा सदस्यया नितिं बागमती प्रदेश क्षेत्र नं. ९ ‘क’ या लागिं भूमि, गुथि अले सम्पदा संरक्षणय् जुयाच्वंम्ह सामाजिक अभियन्ता शैलेश रत्न शाक्यं उम्मेदवारी बियादीगु दु । ‘नीति निर्माण तहलय् सक्षम ल्याय्म्ह’ नारा बियाः चुनावी अभियानय् कुहांवःम्ह शाक्यलिसे लहना सम्वाददातां याःगु खँल्हाबल्हाया सम्पादित अंशः
छि ला ताः इलंनिसें नेपाली काँग्रेसय् सक्रिय जुयाच्वंम्ह, पार्टी त्वःताः स्वतन्त्र उम्मेदवारी छाय् बियादियागु ?
जि २०३७ सालय् विश्व निकेतन स्कूलय् ब्वनाच्वनाबलय् नेवि संघया दुजः जुयागु खः । २०४२ सालय् एसएलसी पास याय्धुंकाः जि काठमाडौं क्याम्पस ताहाचलय् २०४३ सालय् भर्ना जुया । जि न्हापा हे विश्व निकेतनय् हे नेपाल विद्यार्थी संघया दुजः जुइधुनाम्ह जूगुलिं व संगठन छु खः धइगु जितः जानकारी दुगु खः । उगु इलय् प्रचण्डदेव मानन्धरलिसेंया नेतृत्वय् जिं नेवि संघपाखें सदस्य पदय् उम्मेदवारी बिया । तर जि सफल जुइमफुत । व धुंकाः २०४४ सालय् जिं सचिव पदय् दावी यानाः स्ववियू निर्वाचनय् वना । उगु इलय् नं जि चीधंगु मतान्तरं बुत । थ्व हे दथुइ, २०४३ सालय् गणेशमानजिं आउटपोष्ट कब्जाया आह्वान यानादिल । उगु इलय् पार्टी प्रतिबन्धित जुयाच्वंगु खः । जिपिं विद्यार्थी संगठनय् क्रियाशील जुयाच्वनागु, जिपिं हरिबोल दाइ व तीर्थराम दाइया छेँय् वनाः गणेशमानजिया अपिल इउँवनेगु । उगु इलय् जिं १२ वडां सुं हे म्हमस्यू । न जितः चक्रमान डंगोल हे काँग्रेस धकाः स्यू । जिं म्हस्यूम्ह धइम्ह नारायणदास कारंजित, रमेश श्रेष्ठ व प्रवेश दाइ खः । ल्याय्म्हय् जि याकःचा हे ।
तीर्थराम दाइ व हरिबोल भट्टराईं प्रधानपञ्च व उपप्रधानपञ्चय् उम्मेदवारी बियादीगु इलय् जि बूथ प्रतिनिधि जुयाः च्वनागु खः । जिं काँगे्रसया १२क्वःगु, १३क्वःगु व १४क्वःगु महाधिवेशनय् ब्वति कयागु दु । १४क्वःगु महाधिवेशनया झ्वलय् हे जिं बागमति प्रदेशया ९ (१) य् उम्मेदवारी बीत थुगु क्षेत्रया प्यंगुलिं इकाईया सभापतितलिसे सहलह यानागु खः तर, २०७४ या निर्वाचनय् इन्द्रमान तुलाधरयात टिकट बिल । व धुंकाः १४क्वःगु महाधिवेशनया झ्वलय् प्रदेश सभापतिया लागिं सहलह न्ह्याका । थुकिया लागिं १२ वडा इकाईलय् माइन्यूट तकं जूगु खः । प्रदेश कमिटीया लागिं १२ वडाय् जक १८कू भोट दु । नेवाः बाहुल्य दुगु क्षेत्रय् जितः ६५ भोट वइगु अपेक्षा दुगु खः तर, जितः जम्मा ८ मत जक वल । काँग्रेस दुनेया गुटबन्दीया शिकार जि जुल । नेता ध्यानगोविन्द रंजितं ‘छ न्हापा नेवाः अले जक काँग्रेस धाइम्ह’ धकाः गुटबन्दीया शिकार दय्कल । जितः कम्यूनिष्ट पार्टीतय्सं नं थःगु पार्टीइ वय्त इनाप मयाःगु मखु तर, जि प्रजातन्त्रवादी जूगुलिं गुगु नं हालतय् कम्यूनिष्ट पार्टीइ वनेफइमखु धकाः काँग्रेसय् हे च्वंच्वनागु खः । जितः प्रदेश सभापतिइ निर्वाचित जूम्ह मोहन बस्नेतं फोन यानाः सल्लाहकारय् मनोनित यानागु धयादिल तर, व धुंकाः छुं नं बैठक अले छलफलय् जितः मसःतल । थुकथं जितः गुटया राजनीतिया शिकार दय्केधुंकाः वंगु पंजराया दिनय् नेपाली काँग्रेस पार्टी परित्यागया घोषणा यानाः प्रदेश सभा सदस्यया नितिं स्वतन्त्र उम्मेदवारी बियागु खः ।
स्वतन्त्र उम्मेदवारीया झ्वलय् तुतां चिं हे छाय् ले ? स्थानीय निर्वाचनया लहरया हुनिं खः लाकि ?
काँग्रेस पार्टी परित्यागु याय्धुंकाः नेपाः राष्ट्रिय पार्टीयात पुनर्गठन यानाः व हे पार्टीं चुनावय् कुब्वाय्गु तयारी नं यानागु खः तर, छुं प्राविधिक कारणं थ्व बिचाः ताःलाय्मफुत । व धुंकाः जिं तुतां चिं कयाः प्रदेशसभाय् उम्मेदवारी बियागु खः । थ्व चिं हाम्रो नेपाली पाटीयागु खः, तर पार्टीं जितः स्वतन्त्र उम्मेदवार हे खः, पार्टीया ह्वीप वइमखु धकाः च्वयाः ब्यूगु दु । अय्जूगुलिं जिं स्वतन्त्र हैसियतं तुतां चिन्हय् उम्मदेवारी बियागु खः ।
छिगु उम्मेदवारी छाय् खः ?
जिगु उम्मेदवारी नेवाःया लागिं खः । नेवाः सम्पदा, सभ्यताया रक्षाया लागिं जिं प्रदेशसभाय् उम्मेदवारी बियागु खः । जिं ज्या याय्गु धयागु नेवाः जनताया लागिं खः । जितः साम्प्रदायिक धाःसां छुं हे खँ मदु तर, जि नेवाः जनताया हक, अधिकार व हितया लागिं हे न्ह्यज्याय्गु जुइ ।
छिगु जीतया आधार छु खः ?
जिं उम्मेदवारी बियागु क्षेत्र येँ मनपा १२, १४, २१ व २२ वडा खः । थुकी १२ वडा जि बूगु, ब्वलंगु क्षेत्र खःसा २२ वडाय् जिगु पाजुपिं खः । २१ वडा जिगु पुख्र्यौली थाय् खः । येँ मपा १४ वडाय् नं जिगु शुभेच्छुकत दु । थ्व हे जिगु चुनाव त्याकेगु मू आधार खः । जिं समाजया लागिं बियागु योगदानया पाय्छि मूल्यांकन जुइ धइगु विश्वास जिं कयागु दु । जि छम्ह सम्पदा अभियन्ता खः । जिगु अगुवाइलय् न्हूपुखूया पुनर्निर्माणय् जुयाच्वंगु लापरवाहीयात फाय्त ताःलात । धरहरायात भूकम्प पार्क दय्केमाः धयाम्ह नं जि हे खःसा काष्ठमण्डप पुनर्निर्माण समितिया दुजः जुयाः झीगु सम्पदायात मौलिक रुपं थनेत ताःलात । अथे हे, यंगाः हितिया संरक्षणया लागिं जिं पहल यानागु खः । लिपा जितः अन निषेध यात व आः अन गज्याःगु हालत दु धइगु छिं हे स्वय्फइ ।
मेखे, जितः नेपाली काँग्रेसया पासापिन्सं नं ग्वहालि बी धइगु विश्वास दु । वंगु निर्वाचनया हे लिच्वःयात स्वय्गु खःसां थुगु क्षेत्रं ६२% हाराहारीइ मत कुतुंवंगु खनेदु । उकी अप्वः धइथें मत स्वतन्त्र उम्मेदवारं हःगु खनेदु । व आधारय् जिगु गणना अनुरुप धायेगु खःसा जि निगूगु थासय् दु । जिं भचा मिहेनत याःसा जि हे निर्वाचित जुइ ।
तर न्हापाया निर्वाचन स्वय्गु खःसा थन नेकपा (एमाले)या पकड खनेदु । व धुंकाः तिनि काँग्रेस खनेदु । छिं निगूगु थाय्या दावी गुकथं यानादी ?
नेपाली काँग्रेसय् जिं ३८ दँ बियागु दु । जि छखा हे छेँय् च्वनाम्ह जूगुलिं जिं दक्वं स्यू । जि छम्ह स्वतन्त्र उम्मेदवार जूगुलिं जि पार्टीया दास मखुत । तुतांयात हे भोट बीमाः धाइपिं नं दु । दुनं ग्वहालि याय्, पिने वय्मफु धाइपिं नं दु । काँग्रेसी पासापिन्सं स्वतन्त्र जूगुलिं जितः भोट तय्मज्यू धयाच्वन तर, म्हिगः झी पासा सञ्जय महर्जनयात स्याःपिं माओवादीयात भोट फ्वं जुयाच्वन । उमिसं पासाया हत्यारायात भोट बीगु कि जितः ? गठबन्धनया हुनिं सुयात भोट बीगु धइगु अलमल दु । जिगु प्रतिद्वन्द्वीया रुपं नेपाली काँग्रेसया हे उम्मेदवार दुसां जि ३८ वर्ष काँग्रेसय् ज्या याय्धुनाम्ह, जिगु विपक्षया उम्मेदवार झापां इहिपाःः यानाः नकतिनि जक थन वःम्ह ।
चुनावय् छि हे त्यात धाःास छिं छु छु ज्या यानादी ?
जि चुनाव बुत धाःसा न्हापा थें सामान्य नागरिक हे जुइ । यदि त्यात धाःसा जिं थम्हं यानावयागु ज्यायात न्हूगु ढंगं न्ह्यःने यंके । प्रदेश सदस्यया सपथ ग्रहणय् म नेवाः परम्परागत वसतय् नेपालभाषां हे सपथ ग्रहण याय् । व धुंकाः जिं बागमती प्रदेश मुर्दावाद नेवाः–ताम्सालिङ्ग जिन्दावादया नारा थ्वय्के । म्हिगः नेकपा एमालेया प्रदेशसभा सदस्यद्वय अजयक्रान्ति शाक्य व राजेश शाक्यं नेपालमण्डल नामाकरण मजूसा राजीनामा बीधाःगु खः तर मब्यू । न त पार्टी हे परित्याग यात । जि ला स्वतन्त्र खः, जिं न्ह्यागुं याय्ज्यू ।
व धुंकाः जि निर्वाचित जुल धाःसा जिं येँया सांस्कृतिक सम्पदां जाःगु क्षेत्र १२, २१ व २२ या सडक बांलाके । निगूगु ज्या, थन सडक मतया बांलाःगु व्यवस्था याय् । स्वंगूगु ज्या, २२ वडाया तिंख्यः ध्वाखानिसें मरुसतः तक्कया क्षेत्रया छेँत परम्परागत स्वरुप बीत लँय् चिकं अप्पां सियाः प्राचीन स्वरुपयात पुनर्जागरण याय्त पहल याय् ।
