प्रतिनिधिसभाय् १२ गु दलया प्रतिनिधित्व जुइगु दु। समानुपातिकया थ्रेस होल्ड न्हय्गू दलं राष्ट्रिय मान्यता काःगु दु।

निर्वाचन आयोगया समानुपातिकपाखे प्रवक्ता गुरुप्रसाद वाग्लेया कथं मतगणना ज्या क्वचायेवं दलपिन्स गुलि सिट ल्याः टुग्ये याना थौं हे दलपिन्त पौ छ्वइ धका धाःगु दु।

लिपागु मत परिणाम कथं कुल सदर मतया ३ प्रतिशत थ्रेसहोल्ड हःपि एमाले, कांग्रेस, माओवादी, राष्ट्रिय स्वतन्त्र पार्टी, राप्रपा, जसपा व जनमत याना न्हय्गू दल राष्ट्रिय पार्टी जुइत ताःलागु दु। थ्रेसहोल्ड कटे यायेत ३ लाख १६ हजार ८ सय २ मत माः धका आयोगं धाःगु दु।

समानुपातिकपाखे न्हापागु दल नेकपा एमाले न २८ लाख ४५ हजार ६ सय ४१ मत हःगु खः। नेपाली कांग्रेसं २७ लाख १५ हजार २ सय २५ मत, माओवादी केन्द्रं ११ लाख ७५ हजार ६ सय ८४, राष्ट्रिय स्वतन्त्र पार्टी न ११ लाख ३० हजार ३ सय ४४, राष्ट्रिय प्रजातन्त्र पार्टीं ५ लाख ८८ हजार ८ सय ४९, जनता समाजवादी पार्टीं ४ लाख २१ हजार ३ सय १४, जनमत पार्टीं ३ लाख ९४ हजार ६ सय ५५ व नेकपा (एकीकृत समाजवादी) न २ लाख ९८ हजार ३ सय ९१ मत हःगु खः।

आयोगया कथं दकलय् अप्पो एमाले न थ्रेसहोल्ड कटे वःगु न्हय्गु दलं मत जोडे याना वःगु ल्याखं ३० प्रतिशत मत हःगु दु। एमालें समानुपातिक पाखे ३४ सिट काःगु दु। एमालेया प्रत्यक्षय ४४ सिटयाना आः ७८ सिट थ्यःगु दु। समानुपातिकपाखे नेपाली कांग्रेसं झण्डै २९ प्रतिशत मत हःगु दु। कांग्रेसया ३२ सिट नाप आः ८९ सिट थ्यःगु दु।

अथेहे माओवादी केन्द्रं १२ प्रतिशत मत हया १४ सिट हःगु दु। माओवादीं प्रत्यक्षपाखे १८ व समानुपातिकय्् १४ याना ३२ सिट थ्यःगु दु। राष्ट्रिय स्वतन्त्र पार्टीं समानुपातिकय् १२ प्रतिशत मत हया १३ सिट हःगु दु। स्वतन्त्र पार्टीं प्रत्यक्षय् ७ सिट त्याका आः २० सिट थ्यःगु दु। राष्ट्रिय प्रजातन्त्र पार्टीं ६ प्रतिशत मत हःगु दु। राप्रपां प्रत्यक्ष व समानुपातिकपाखे याना १४ सिट हःगु दु

जनता समाजवादी पार्टी न ४ प्रतिशत मत हःगु दु । जसपां समानुपातिकय् न्यागु व प्रत्यक्षय् ७ सिट नाप १२ सिट थ्यःगु दु। अथेहे, जनमत पार्टीं ४ प्रतिशत मत हःगु दु। समानुपातिकय् न्याःगु व प्रत्यक्षय् छगु १ सिट नाप जम्मा खुगु सिट थ्यःगु दु। निर्वाचन आयोगं लिपागु विवरण तयार यायेगु ज्या जुयाच्वंगु दु।

Categorized in राजनीति