येँ मनपा २२ वडाय् लाःगु लुँहितिया संरक्षण याय्गु खँय् धरहरा परियोजनां लापरवाही याःगु खँयात कयाः खबरदारीयासें तत्कालया निंतिं ज्या दिकेत इनाप याःगु दु ।

लुँहिति व धरहरा नेपाःया छगू महत्वपूर्ण सांस्कृतिक व ऐतिहासिक सम्पदाकथं दुगु सकसिनं स्यूगु खँ खः धासें येँ मनपा २२ वडाया नायः चिनिकाजी महर्जनं पुरातात्विक महत्वया संरचना स्यंकूगुलिं परियोजना तत्काल न्ह्याके मबीगु खँय् बः बियादिल । वय्कलं लुँहितिया लः मुंकेत धकाः ट्यांकी म्हूगु इलय् लुँहितिइ लः वनीगु सिँयागु धः पूवंक स्यंगु खँय् आपत्ति प्वंकादिल ।

वय्कलं अन लुँहितिलिसे सम्बन्धित छुं नं निर्माण याय्त थःपिनिलिसे समन्वय याय्त इनाप यानागु खँयात छाय् बेवास्ता यानादियागु धकाः परियोजना पक्षयात नं न्ह्यसः तयादिल । येँ मनपाया मेयर बालेन्द्र शाहं नं अवलोकन यानादीगु लुँहितिया ट्यांकी निर्माणया निंतिं खनातःगु गालय् सिँयागु धः पूवंक स्यंकातःगु खँय् आपत्ति प्वंकादिल । धरहरा सुन्धारा संरक्षण समितिया संयोजक गौतम डंगोलं थःपिसं पुनःनिर्माणया ज्याया झ्वलय् पुरातात्विक महत्वया संरचना स्यंगु खँय् आपत्ति प्वंकाबलय् परियोजनां मेयर बालेन्द्र शाहलिसे समन्वय यानाः ज्या यानागु धाःसां मेयर शाह न्ह्यःने दुबले उज्वःगु छुं नं कथंया समन्वय मजू धइगु खँ न्ह्यःने वःगु खँ कुलादिल ।

स्थानीयबासीपिसं मंकाःकथं छगू प्रेस वक्तव्य जारी यासें थ्व विषयस धाःगु दु, ‘२०७२ सालया तःभुखाचं पूवंक स्यंगु धरहराया भग्नावशेषया उचित संरक्षण तकं मयासें मेगु न्हूगु धरहरा दय्केत हथाय्चाःगु सरकारं म्हिगः अन हे दुगु उलि हे महत्वपूर्ण सम्पदा सुन्धाराया अस्तित्व हे न्हंकेगु कुतः जूगु दु ।’विज्ञप्तिइ ‘धरहरा पुननिर्माण योजना हःगु इलय् तत्कालीन सरकारलिसे सुन्धाराय् प्राकृतिक रुपय् लःया धाः न्ह्याइगु व प्राकृतिक रुपं हे निकास याय्गु गुगुुं योजना हे मदु । हाकनं नं स्थानीयया हे निरन्तरया दवावय् तत्कालिन सरकार सुन्धाराय् प्राकृतिककथं लः हय्त अले निकास याय्त सहमत ला जुल तर थुकी गुबले नं छुं ज्या मजूगु’ खँ न्ह्यथनातःगु दु ।

थ्व हे झ्वलय् मंसिर २५ गते आईतवाः लुँहितिइ लः हाय्केत न्हापा न्हापा सिं दय्कातःगु फुक्क संरचना हे पूर्ण रुपय् नास याःगु विज्ञप्तिइ न्ह्यथनातःगु दु । विज्ञप्तिइ धयातःगु दु, ‘धरहरा नां बियाः तुयूगु उंया न्हूगु टावर ला दय्कल तर सुन्धाराया ऐतिहासिकता व थनया स्थानिय मौलिक त्वनेगु लःया गौरवपूर्ण सभ्यता व प्रबिधिया पुनर्निर्माण जुइ धइगु खँय् भलसा काय् फइगु अवस्था मन्त । उकिं थुगु खँयात सार्वजनिक याय् चाहे जुया ।’विज्ञप्तिइ सरोकारवालापिसं लुँहितिया ऐतिहासिक मूल्य मान्यताकथं पुननिर्माणया प्रत्याभूति मजूसां परियोजनाया सकतां ज्या दिकेत व मंसिर २५ गतेया घटनाय् दुथ्याःपिन्त कारवाही याय्त माग यानातःगु दु ।

अथेहे विज्ञप्तिइ सम्पदा पुनर्निर्माणया ज्याय् स्थानियया प्रतिनिधि व पुरातत्वबिदया अनिवार्य सहभागिता दय्माःगु लिसें स्थानीयरुपय् परियोजनां न्हूगु धरहरा टावर दय्केगु झ्वलय् हेभीलोड दुगु गाडी वय् वने याइगुलिं दुगु सडक स्यनाः वा वःगु इलय् ध्याचः व मेबलय् धू ब्वइगु समस्यां स्थानीय छेत्रय् दुगु वायुप्रदूषण तत्काल नियन्त्रण याय्त व परियोजनां स्यंगु दुरसंचार केन्द्रया ज्याकू न्ह्यःनें खिचापुखूतक वनेगु सतक कालोपत्रे याय्माःगु माग यानातःगु दु ।थौंया ज्याझ्वलय् संकटा क्लबया नायः ईन्द्रमान तुलाधर, खिचापोखरी युथ क्लबया नायः राजेश डंगोल, साधारण क्लबया नायः राधाकृष्ण महर्जन व त्वाः छें परिवार क्लबया नायः बिन्देश्वर श्रेष्ठलिसें स्थानीय व्यक्तित्वपिनि ब्वति दुगु खः ।

Categorized in राष्ट्रिय