थौंकन्हय् कमेडि क्लबया ज्याझ्वः न्ह्याकामि विशाल भण्डारी व मेयर बालेनया जुहारी भाइरल हे जुयाच्वंगु दु । शनिबाः बिशालं रक्षक हे भक्षक धयातःगु छगू फोटोलिसें थःगु खँ पोस्ट यात । उकी विशालं बालेनयात सुझाव हे बियातःगु खनेदु । ‘विकासया डाटां विरोधीया सः क्वत्यलेफइ, स्यंकेगु बाहेक दय्कूगु छुं खनेमदु धाइपिं अप्वयावल, आः स्यके गात, दय्के’ विशालं थथे धकाः च्वल । तर येँ महागनर प्रमुख बालेन्द्र शाहया लिसः ला असामाजिक ढङ्गं हे वल । कमेन्टय् मेयर बालेनं च्वल, ‘छंगु शोलय् धेबाया भोटं त्याइ, छ धेबा कमे याःवःम्ह खः, छंगु अस्तित्व धेबा बाहेक छुं हे मदु, छन्त जीवनय् धेबा बाहेक छुं हे कमे याय्माःगु मदु, छ थज्याःम्ह बिकाउ मनूयात लिसः बियाच्वने जरुरी मदु ।’

 

छम्ह सर्वसाधारणयात मेयर थुज्वःगु जिम्मेवार पदय् दुम्हेसिनं थज्याःगु लिसः ? थन धेबा कमे याय्गु ज्या यानामच्वंम्ह सु दइ ? सांसारिक सुख, माया, मोह त्याग याय्धुन धाइपिं भिक्षु, जोगीतय्सं ला प्वाः थनेत भिक्षा फ्वनी, दानदक्षिणा काइ । प्वाः थनेत हरेक मनू छुं नं छुं कर्म यानाच्वंगु हे दइ, छगू छुं पेशा यानाच्वंगु हे दइ । आः धाय्बलय् सुनां मेयरयात न्ह्यसः हे तय्मन्त खत ला ?

 

थथे धयाच्वँच्वं मेगु छता खँ, जनप्रतिनिधिं तलब काय्मदु खः का । तर मेयर बालेनं भत्तालिसें मेमेगु छुं हे सुविध मकयागु हे खः ला ? मेयर बालेनं मेमेगु आयमूलक छुं हे ज्या मयाःगु खःला ? धेबा कमे याइपिन्सं न्ह्यसः तय्मदु धाय्गुया अर्थ धेबा कमे याइपिं मेयर नं जुइमदुगु खःलाकि ?

 

थुलि खँ जुइधुंकाः विशाल भण्डारीं मेयर बालेनयात श्री ८ हे धयाबिल । ‘जिं न्ह्यसः न्यना, माफ यानाब्यु श्री ८ बालेन शाह, स्यंकेगु बाहेक छु दय्का ?’ विशालं मेगु स्टाटस पोस्ट यात । थुकिया लिसलय् नं बालेनं छंगु गांया मेयरं छु यानाच्वन धकाः न्ह्यसः तल । थथे धाय्बलय् मेयर बालेन जक येँ महागनरया रैथाने खःला ले ? मेयर बालेनं थःगु गां महोत्तरीया एकडारा गामय् छु जुयाच्वन स्यू ला ? अन गामय् विकास याय्त गबलें पलाः तयागु दु ला ?

 

सार्वजनिक पदय् लातकि न्ह्यसःया सामना याय्माली । जनतां न्ह्यसः न्यनी, उकिया लिसः नं बीमाः । मखुला जनतायाके भोट कयाः पदय् जक थ्यनेगु खःसा बालेनं दलीय मनूत स्वयां स्वतन्त्र उम्मेदवारयात झन विश्वास याय्मज्यू धकाः प्रमाणित याइ । थुलि धाधां छता खँ मधाःसे मगाः । थुँ जक थुनेगु ला, दय्केगु गबले ?