नेकपा एमाले निकट अनेरास्ववियुया नेतृत्व ल्ययेगुया लागि प्रज्ञा भवन मतदान जुयाच्वंगु दु।

फागुन २ गते निसे न्ह्यानाच्वंगु २३ क्वःगु महाधिवेशनं नेतृत्वया लागि न्याम्हेसिया प्रतिस्पर्धा यानाच्वंगु दु। अध्यक्ष पदया लागि आरसी लामिछाने, समिक बडाल, याङ्छु योञ्जन, मोती विक व लोकेश निरौलापिन्स उम्मेदवारी बिःगु खः।

प्यम्ह उपाध्यक्षया लागि १७ म्ह प्रतिस्पर्धा याःगु दु। महासचिव पदया लागि न्याम्ह दथुइ प्रतिस्पर्धा जुयाच्वंगु दु। सुदर्शन सिवाकोटी, भाष्कर खनाल, नरेश रोकाया, उमेश आचार्य व कल्पना वाइवा महासचिव पदया लागि प्रतिस्पर्धा यानाच्वंगु दु।

झीम्ह  सचिव पदया निति ५८ म्हेसिगु उम्मेदवारी दुगु खः। कोषाध्यक्षय् न न्याम्हेसिगु उम्मेदवार दुगु खः। संगम अर्याल, सुजन कार्की, प्रज्वल फुँयाल व प्रदीप बीसीं कोषाध्यक्षया उम्मेदवारी बिःगु खः।

चुनावी मैदानय् ६१४ म्ह दु धका अध्यक्ष मण्डलया सदस्य रचना खड्कां धाःगु दु। वयकःया कथं, आः ४२ मत केन्द्रपाखे मतदान जुयाच्वंगु दु। थौं हे लिच्वः वइ धका धाःगु दु। थुगु महाधिवेशनय् १५ सय ८८ म्ह प्रतिनिधिपि दु।

Categorized in राष्ट्रिय